Jalil rahmat

30.09.2007.
Gulqaychi

Gulzor ichra kirib keldi uch nafar qiz,

Dilobar qiz, Sanobar qiz, Nilufar qiz,
Orazi gul, sochi sunbul, ko’zi nargiz,
Qo’llarida o’ynab turar gulqaychisi,
Oromimni olar bir-bir har qaysisi.

Bog’ chetidan kuzataman boqib asta,

Ikkisi gul qirqib, biri qilar dasta,
Shu nafasda yurak xasta, vujud xasta,
Qo’llarida o’ynab turar gulqaychisi,
Oromimni olar bir-bir har qaysisi.

Sevib qoldimmi?, bir yo’la uchovini,

Tutolmasdan qaysar ko’ngil jilovini,
Qalab-qalab qalbimga ishq olovini,
Qo’llarida o’ynab turar gulqaychisi,
Oromimni olar bir-bir har qaysisi.

Uchovi uch quchoq gulni olib qaytar,

Binafsharang ro’moliga solib qaytar,
Jalil Rahmat, nochorgina nolib qaytar,
Ko’ksiga sanchilib qator gulqaychisi,
Bir-biridan ekan ayyor har qaysisi.
Chiroyli sening

Zulflaringdan tarar gul isi,

Lablaringda g’uncha kulgusi,
Ko’z emas bu, Zuhro yulduzi,
Boqishlaring chiroyli sening.

Arshlarda sayr etgan hur kabi,

Tovlanishlar toza dur kabi,
Ruhimda bir parcha nur kabi,
Oqishlaring chiroyli sening.

Ibo bilan taqib zirakni,

Ko’zguda aks etib suratni,
Nozlar qilib, nozik yurakni
Yoqishlaring chiroyli sening.

Atirgulni bag’rimga bosa,

Yonog’idan ololsam bo’sa,
Bo’yningda bir juftgina o’sha,
Oqqushlaring chiroyli sening.
10.10.2007.

Oftobmisiz, ofatmi

Oftobmisiz, ofatmi?,

Va yo parisifatmi,
Bir boshga ming kulfatni,
Solasiz har boqishda.

Belingiz nozikkina,

Mehringiz ozdekkina,
Berk ko’chada bekina,
Ustasiz o’t yoqishda.

Kaftingizda nimkosa,

May quysangiz xush, toza,
Atirguldan andoza,
Olasiz yozu qishda.

Bosh belandi qirovga,

Kelib keting birrovga,
Yurakkinam bezovta,
Qilasiz o’ngu tushda.

Ishq yurti had-hududsiz,

Demang, “noshud yigitsiz”,
Boylab qo’yasiz ipsiz,
Go’zalim shu ketishda.

Jalil Rahmat gap uqmas,

Ko’ksiga bir gard yuqmas,
Muhabbati quruqmas,
Urib ko’rasiz tishga.
Kokil tarab

Tarab-tarab kokilini, taratar gul isini,

Qarab-qarab jon tilindi, bilolmasman ismini.

Qo’l cho’zsam nozik beliga, nozli qarab qo’yadi,

Taroq urib kokiliga, oz-oz tarab qo’yadi.

Qaro qoshlar qarshisida qaltirar qirq qaroqchi,

Qoldirdi g’am, tashvishiga qirqilgan kalta sochi.

Tomchi-tomchi gilos suvi lablarida yugurgan,

Oy desa oydan suluv u, kundan o’zib ulgurgan.

Qaysi bog’dan ko’chib tushgan ko’ksiga juft olmasi,

Yurakkinam cho’chib tushgan, birov uzib olmasin.

Ko’ksini tortibdi tarang, egnidagi zar nimcha,

Jonim omon qoldi arang, nozi shirin namuncha.
Tarab-tarb kokilini taratar gul isini,
Qarab-qarab jon tilindi, bilolmasman ismini.