Jalil rahmat

27.12.2008.
Ey erkam

Shalolalar shavqi xush yoqar,

Jilg`alarda ohanglar oqar,
Jayronlar ham jilmayib boqar,
Sho`xligingni eslab ey erkam.
Sho`xligingni eslab ey erkam,
Xayollarim ko`chasi ko`rkam.

Dardim olis dalangda qoldi,

Pari chehra pallangda qoldi,
Vujudim o`t alanga oldi,
Cho`g`ligingni eslab ey erkam.
Cho`g`ligingni eslab ey erkam,
Kunim kuyar betoqat ertam.

Kiprikda ko`z yoshlar qalqidi,

Soylar toshib toshlar qalqidi,
Hushi uchib boshlar chalg`idi,
Yo`qligingni eslab ey erkam.
Yo`qligingni eslab ey erkam,
Dunyo bir kam, ko`ngil ham bir kam.
15.01.2009
Uyg`otib qo`yma

Yulduzga qo`l cho`zsam samoda uchib,

Bir pas orom olsam xayoling quchib,
Latif labingdan bol bodalar ichib,
Bag`ringda uxlasam, uyg`otib qo`yma.

Diydamdan dur to`ksam diydoring so`rab,

Nigohingga cho`ksam xumoring so`rab,
Sunbul sochlaringni bo`ynimga o`rab,
Tushimda yig`lasam, uyg`otib qo`yma.

Zulfu kokilingdan tolalar qirqib,

Gulsavat to`qisam afsunlar o`qib,
Gunohlardan cho`chib xudodan qo`rqib,
Ko`ksimni tig`lasam, uyg`otib qo`yma.

Agar yana bir bor balki so`nggi bor,

Vaslingni tilasam, uyg`otib qo`yma.
01.02.2009.

Meni tashlab qo`ymang birovga

Ko`zingizda kulib turgan kurtakman,

Ko`ksingizda yig`lab turgan yurakman,
Siz uchun bir afsonaman, ertakman,
Jonim meni tashlab qo`ymang birovga.

Qay bir oshiq gul ishqida kuymagan,

Qismat meni qil ustida qiynagan,
Birovlarga sizni ko`zim qiymagan,
Siz ham meni tashlab qo`ymang birovga.

Quyosh yig`ar tongda shabnam durlarin,

Mehr yuvar dilning g`ubor, kirlarin,
Qizg`aldoq ham qumsab yashar qirlarin,
Jonim meni tashlab qo`ymang birovga.

Sitamlardan dilgir dili siyohman,

Bir barmoqqa bardoshi yo`q giyohman,
Suratingiz tushgan sirli nigohman,
Jonim meni tashlab qo`ymang birovga.

Siginganim qalb ko`shkingiz mehrobi,

Sog`ingani sof sevgingiz selobi,
G`arq aylasin g`am-g`ussangiz girdobi,
Faqat meni tashlab qo`ymang birovga.