Jalil rahmat

08.07.2009.
Yangi yil

Yangi yilda yana yangi soz yangrar,

Dil tubida tugilgan dilroz yangrar,
Tanovoru Dilxiroj, Gulnoz yangrar,
Qadamlari qutlug` yangi yil keldi.

Kapalakqor ko`kda nafis raqs etib,

Zamin uzra ezgulikni naqsh etib,
Shukronalik shukuhini baxsh etib,
Kunlari yop-yorug` yangi yil keldi.

Tillaga kon gulga makon yerimga,

O`ziga bek o`ziga xon elimga,
Bedorlikda beshik quchgan kelinga,
Niyatlari ulug` yangi yil keldi.

Kapalakqor

Ko`k bulutlar ashki chiroyli,

Kapalakqor raqsi chiroyli,
Qanotining naqshi chiroyli,
Kapalakqor oq kapalagim,
Yangi yilda oppoq tilagim.

Ezgulikning elchisi o`zing,

Beg`uborlik belgisi o`zing,
Ko`kning mitti yulduzi o`zing,
Kapalakqor oq kapalagim,
Yangi yilda oppoq tilagim.

Kaftim ochsam duo bo`lib tush,

Dur bo`lib tush jilo bo`lib tush,
Yurakka sho`x navo bo`lib tush,
Kapalakqor oq kapalagim,
Yangi yilda oppoq tilagim.
07.12.2009.
Talashgim kelmas

Azal-azaldan dunyo rangi oqu qoradir,

Shoh bo`lsin u, yo gado, bir yo`lda ovoradir,
Otdan tushsa-da, ammo egar quchib boradir,
Belbog`siz beklar bilan maydon talashgim kelmas.

O`sayotgan bo`yimni qirqmoq payida ular,

Egar bo`lsam bo`ynimni sirtmoq payida ular,
Chalg`itar so`z, kuyimni eng avj paytida ular,
Belbog`siz beklar bilan doston talashgim kelmas.

Cho`g` ushlashni xush ko`rar birovlarning kaftida,

Tubanlikni tush ko`rar hasad o`ti taftida,
O`zni lochin qush ko`rar, Sulaymonning taxtida,
Belbog`siz beklar bilan osmon talashgim kelmas.

Kelar bo`lsam yuzma-yuz poyimga gul to`sharlar,

Ketar bo`lsam, izma-iz tosh otgan ham o`shalar,
Har yonga yoyib ildiz xorpechakday o`sarlar,
Belbog`siz beklar bilan iymon talashgim kelmas.

Kimlar qasr g`amida duru marjon talashar,

Kimlar qadr g`amida oru vijdon talashar,
Bir kun qabr g`amida parcha makon talashar,
Jalil Rahmat men balki nodon talashgim kelmas.