Jalil rahmat

30.11.2008.

Sevib topolganim

Sokin tunda seni sog’indim,

Ishq og’usin ichib og’rindim,
Oyga oyna tutib ovundim,
Dilda hamon vasling umidi,
Sevib topolganim shumidi?.

Qora soching ham zulfi kajing,

Yuzlarimga chizdilar ajin,
Kunda ming bor kuydirar hajring,
Ko’ngil xazon bo’lgan gulmidi,
Sevib topolganim shumidi?.

Yodimda, u yomon qarashlar,

Achchiq gina, shirin arazlar,
Oftobdek nur sochgan orazlar,
Hech ushalmas bir orzumidi,
Sevib topolganim shumidi?.

Daraxtni o’xshatib doyaga,

Dard aytdim, u solgan soyaga,
Muhabbat – bu yuksak qoyada,
Jovdirab boqqan ohumidi,
Sevib topolganim shumidi?.

Gul qo’ynida uxlab chiqqan qiz,

Tushlarida yig’lab chiqqan qiz,
Mening ko’ksim tig’lab chiqqan qiz,
Ishqi yolg’on his, tuyg’umidi,
Sevib topolganim shumidi?.

Xayolan yot chamanda yotdim,

Gulni o’pib gunohga botdim,
Yurak, senga yana yuk ortdim,
Bu yuk, og’ir g’am, qayg’umidi,
Sevib topolganim shumidi?.

Sevolmasdan yashay qanday

Jismim olovda yonganday,

Jonim erib oqar shamday,
Qancha sevsam, shuncha kamday,
Sevolmasdan yashay qanday.

Har gul ishqi ming bir armon,

Ko’ngil gul shoxida larzon,
Aro yo’lda o’zim sarson,
Sevolmasdan yashay qanday.

Gulga qo’shib parcha dilim,

Qirqib olib, go’zallar jim,
Gul qaychi og’rig’i sim-sim,
Sevolmasdan yashay qanday.

Jalil Rahmat jonim omon,

Sevmay o’tgan kunim yolg’on,
Yer qattiq olisda osmon,
Sevolmasdan yashay qanday.
* * *

Yonib ketdim, yoniq ko’zlar qarashidan,

Kel, bir o’pay, o’sha chashmi qarog’ingni.
Rashkim kelar kokilingni tarashidan,
Tishi bir-bir sinib tushsin tarog’ingni.

Muhabbatning yarmi hijron, yarmi visol,

Nasib qilsa, yoningga bir bormog’imni,
Tun qo’ynida adashtirib, sindira qol,
Sochlaringga oralagan barmog’imni,

Qaramasang, ko’rmasdim ham, kuymasdim ham,

Yurak endi ko’tarolmas firog’ingni.
Qaramagan bilan, hech tinch qo’ymasdim ham,
Labga bosmay turib, la’li dudog’ingni.

Yonib ketdim, yoniq ko’zlar qarashidan,

Kel, bir o’pay, o’sha chashmi qarog’ingni.