Жиноят-процессуал кодексига

497⁸-модда. Апелляция шикояти ёки протестини қайтариб олиш


Ҳукм устидан шикоят берган ёки протест билдирган шахс ўз шикояти ёки протестини қайтариб олишга ҳақ­лидир. Протестни қайтариб олиш ҳуқуқига юқори турувчи прокурор ҳам эга. Маҳкум ўз ҳимоячисининг шикоятини қайтариб олишга ҳақлидир.

1. Шарҳланаётган моддага мувофиқ апелляция шикояти(протести) берган шахс ўз шикояти(протести)ни, маҳкум эса, ҳимоячиси берган шикоятни ҳам қайтариб олиш ҳуқуқига эга. Протестни қайтариб олиш ҳуқуқи лавозими бўйича юқори турувчи прокурорга ҳам тегишли.

2. Қонун мазмунига кўра апелляция шикояти (протести) апелляция инстанцияси суди маслаҳат хонасига киргунга қадар қайтариб олиниши мумкин. Берилган шикоят (протест) ёхуд унинг нусхаси ва уни ҳақида ҳужжат ишда қолади.
3. Апелляция шикояти (протести)нинг қайтариб олиниши, агар иш бўйича бошқа процесс иштирокчилари томонидан берилган апелляция шикояти (протести) бўлмаса, апелляция тартибида иш юритиш тугатилишига олиб келади.


497⁹-модда. Биринчи инстанция судининг ажрими устидан
шикоят бериш ва протест билдириш


Иш бўйича биринчи инстанция судининг ажрими усти­дан у чиқарилган кундан эътиборан ўн кунлик муддатда ушбу Кодекснинг 497²-моддасида назарда тутилган шахслар томонидан хусусий шикоят берилиши ёки хусусий протест билдирилиши мумкин.
Ҳукм чиқариш билан якунланган суд муҳокамаси чоғида чиқарилган ажрим устидан шикоят берилган ёхуд протест билдирилган тақдирда, ҳукм устидан шикоят бериш ёки протест билдириш учун белгиланган муддат тугагандан кейингина иш апелляция инстанцияси судига юборилади.
Суд муҳокамаси чоғида чиқарилган ва далилларни текши­риш тартибига, процесс иштирокчиларининг илтимосно­маларига, эҳтиёт чорасини танлаш, уни ўзгартириш ёки бекор қилишга, шунингдек, суд мажлиси залида тартиб сақлашга оид ажримлар устидан мазкур модданинг биринчи қисмида назарда тутилган тартибда шикоятлар бериш ва протестлар билдириш мумкин эмас. Буларга қарши эътирозлар апелляция шикояти ёхуд апелляция протестига киритилиши мумкин.