M. Dáwletov, Sh. Allaniyazova, D. Seytqasımov, A. Dáwletova

§ 15. Til bilgen el biledi
87-shınıǵıw. Tekstti oqıń. «Shet tillerin úyreniw — dáwir tala-
bı» temasına baylanıslı sáwbetlesiń.
Ózbekstan Respublikasınıń ǵárezsizlikti qolǵa kirgiziwi 
sırt eller menen tikkeley baylanıs ornatıw imkaniyatın 
jarattı. Bul bolsa watanlaslarımızdıń shet tillerin ele de 
tereńirek iyelewlerin talap etedi. Sebebi shet mámleketlerden 
respublikamızǵa kóplep isbilermenler kele basladı, olar me-
nen túrli tarawlarda birge islesiwler jolǵa qoyılıp atır, 
kóplegen oqıwshı jaslarımız shet el universitetlerine oqıwdı 
dawam ettiriw ushın jiberilmekte, qala berse respublikamızdı 
tanıǵan mámleketler menen diplomatiyalıq qatnasıqlar ornatıl-
maqta. Bul tarawdaǵı oqıw hám jumıslarǵa ornalasıw 
ushın jaslarımız shet tillerin bilmese óz aldına qoyılǵan 
maqsetlerine erisiwde qıyınshılıqlarǵa dus keledi. Sonıń 
ushın da elimizdi keleshekte sawatlı, bilimli, jetik kadr-
lar menen támiyinlew maqsetinde Birinshi Prezidentimiz 
I. Karimov tárepinen «Shet tillerdi úyreniw sistemasın bun-
nan bılay da jetilistiriw ilajları haqqında» qarar qabıl etildi. 
Shet tillerin úyreniw ushın hárbir adamnan waqıt, qunt, 
shıdam, sabır-taqat talap etiledi. Eger biz bul qıyınshılıq-
lardan qorıqpay, qansha kóp shet tillerin úyrensek, baxıtlı 
keleshegimizge tiykar jaratqan bolamız.
88-shınıǵıw. Qosıqtı tásirli etip oqıń hám yadlap alıń.
TÚRKIY TILIM
Qúltegin babadan uqtım atıńdı,
Maxmud Qashǵariydan kórdim xatıńdı,
«Qutadǵu bilig»ten baslap saltıńdı,
Saǵa alǵan meniń túrkiy tilimseń.

---

67
Túrkiy tilim — misli bir nárwan daraq,
Ketken jáhán boylap xalıqlarǵa tarap,
Qulaq shalsa turmay wáspini sorap,
Mánisin túsingen túrkiy tilimseń.
Álemde til kópdur sennen gózzalıraq,
Men ushın bárinen aǵlasań biraq,
Ana súti menen qanıma tarap,
Ana tilim bolǵan túrkiy tilimseń.
(K.Karimov)