Microsoft Word kr dunyoning ishlari ziyouz com doc

www.ziyouz.com кутубхонаси 
95
...Иш том ёпишга етганда ойим мени четга имлаб қаттиқ тайинлади. 
— Агар шу болага эндиям ичирсанг, норози бўламан! Кеча йиқилиб кетишига сал қолди. 
Бировнинг боласи майиб бўлиб қолса, Худо нима дейди! 
Ўша куни тушликда Абдужабборга ётиғи билан тушунтирдим: 
— Энди, биродар, кўнглингизга келмасину тушликда ичмай қўя қолинг. 
Уста у деб кўрди, бу деб кўрди, бўлмади. Охири қовоғи осилиб томга чиқиб кетди. Қўшиқ 
айтиш йўқ, гаплашиш йўқ... Уч-тўрт кун аҳвол шундай давом этди. Кейин мен ҳам ишга тушиб 
кетдим. 
Бир куни тушдан кейин хабар олай деб келсам, узоқдан устанинг вадаванг ашуласи 
эшитиляпти. Тунукани икки марта тарақлатадию иягини ўнг томонга чўзиб чираниб қичқиради: 
Боғ аро-о-олаб бораман... 
Болғани яна икки марта уради-да, иягини чап томонга чўзиб қайтаради: 
Гулшан аро-о-олаб бораман... 
Ошхонада чой қайнатаётган ойимнинг олдига кирдим. 
— Бу, яна «боғ аролаб» бориш бошланибди-ку, ким ичирди? 
— Билмасам, — дейди ойим менга қарамай. — Ичгани йўқ шекилли. 
Абдужаббор гапимизни эшитиб қолди чоғи, томдан туриб бақирди: 
— Нима деяпсиз, ўв акам! Ичган бўлсам босган изим орқамда қолсин. Нима, ичсам айтишга 
қўрқаманми сиздан! Пошша ойимнинг олдиларида ичиб жинни бўпманми! Яхшиси, битта опкеб 
қўйинг «оқбола»дан! Кечқурун жигарини эзамиз... 
Бировга туҳмат қилгим келмай индамай қўя қолдим. Кейин бу гаплар унутилиб кетди. 
...Яқинда уйда ишлаб ўтирсам, Абдужаббор келиб қолди. Кийимлар башанг, дўппи бошга 
қийшиқ қўндирилган. Соқоллар қиртишланган... 
— Қалай, акам, қоғоз қоралаб ўтирибсизми! — деди шанғиллаб. — Бизга хизмат-пизмат йўқми 
бундоқ. 
Қизиқ, унинг шанғиллаши, чапаниларча «акам» деб гапириши ҳам ўзига ярашади. Қучоқлашиб 
кўришдик. 
— Озгина оласизми? — дедим кулиб. — Ўшанда беш-ўн кун сазангизни ўлдирган эдим. Энди 
қарзимни узай. 
— Йўқ. — Абдужаббор кескин бош чайқади. — Ўзим қарзимни узгани келдим. 
У шимининг пистон чўнтагини кавлаб ўн сўмлик чиқарди-да, столга қўйди: 
— Мана. 
— Нима бу? 
— Қарзим, — деди у негадир қовоғини солиб. 
Ҳеч нимага тушунмадим. 
—Мендан қарзингиз йўқ. 
— Сиздан эмас, Пошша ойимдан олганман. 
Унинг бирдан ўзига ярашмаган маъюс қиёфага тушиб қолиши ғалати эди. Онамни эслаб, ўзим 
ҳам маъюс тортиб қолдим. 
— Олган бўлсангиз яхши, — дедим секин. — Шуниям ўйлаб ўтирибсизми? 
— Йўқ, — Абдужаббор яна кескин бош чайқади.— Мен бошқача олганман, — деди негадир 
тажанг бўлиб. 
— Нима гап ўзи? 
— Бир чеккадан гапириб берайми? — Абдужаббор ўзини ҳам, мени ҳам ёмон кўриб 
кетаётгандай юзини буриб тўнғиллади. — Бундоқ бўлди. Ўша, том ёпаётган куним уйга борсам, 
қўшниникида тўй бўлаётган экан. Олаверибмиз, олаверибмиз, хурмача ёрилиб кетишига сал 
қопти. Эрталаб турсам бошим ғум! Эшик қаёқда, дераза қаёқда, билсам ўлай. Бунинг устига 
хотин дийдиёсини бошлади. Хотинларни биласиз-ку! — У тасдиқлатиб олиш учун юзимга 
қаради. — Хотин зотига «а» деганда «ма», деб пул обкеб берсанг, латта-путтасини топиб 

---

Дунёнинг ишлари (қисса). Ўткир Ҳошимов