Microsoft Word kr dunyoning ishlari ziyouz com doc

www.ziyouz.com кутубхонаси 
98
— Нимага бош яланг чиқдинг? Совуқ-ку! Уйга кир, шпана! — Шундай дедию бетоқатлик билан 
моторни юргизди. Меҳри хола шоша-пиша фотиҳа тортди. Дўстим энди машинани орқага 
тислантириб ўнглаган эди, онасининг қўл силтаб қичқиргани эшитилди. 
— Тўхтасанг-чи, ҳой! 
Жаҳонгир ноилож яна тўхтади. 
— Ҳа, яна нима, ойи? — деди машина эшигини қия очиб. 
Меҳри хола ҳарсиллаб яқин келди. Тимирскиланиб нимчасининг ён чўнтагини кавлаштира 
бошлади. 
— Нима қидиряпсиз? — Жаҳонгир норозилик билан қошини чимирди. 
— Шошма, болам, — Меҳри хола ниҳоят чўнтагидан бир сиқим пахта чиқарди. — Ма, — деди 
қия очиқ эшикдан узатиб, — қулоғингга тиқиб ол. Биласан-ку, сал шамол тегса қулоғинг 
оғрийди. 
— Оббо! — дўстим пахтани олиб бардачокка ташлади. — Хўп хайр, яхши ўтиринглар. 
— Йўқ, ҳозир тиқиб ол. Кейин эсингдан чиқиб кетади. 
— Уфф! — Жаҳонгир жиндай пахтани наридан-бери думалоқлаб қулоғига тиққан бўлди. Мотор 
гуриллади. Машина шиддат билан олдинга сапчиди. Бир зум жим кетдик. Дўстим йўлдан кўз 
узмай бораркан, хижолат чеккандек тушунтирди: — Одам кексайганидан кейин ёш болага 
айланиб қоларкан-да... 
Мен индамадим. Нима дей? «Шу гапларни нега хотининг айтмади, нега болаларинг айтмади-ю, 
онанг айтяпти, нега бу ёғини ўйламайсан?» дейми? «Сенга қанчалик ҳавас қилаётганимни 
билсанг эди, нодон!» дейми? 
Қизиқ ўша кеча онам тушимга кирди. Қўлида оппоқ пахта кўтариб юрганмиш... 
КАЛТАКEСАКНИНГ ДУМИ 
Шундоқ дарвоза олдида силлиқланиб кетган эски ёғоч скамейка бор. Ҳар куни ишдан қайтишда 
беихтиёр скамейкага қарайман. Бир вақтлар дарвоза олди, мана шу харрак доим гавжум 
бўларди. 
Eрталаб тонг отиши билан онам дарвозани ланг очиб қўяди: фаришта кирармиш. Ҳали 
уйғонмасимдан гангур-гунгур суҳбат бошланади. 
— Яхши ўтирибсизми, пошша ойи? 
— Шукур, айланай. Ўғлингиздан хат борми? 
— Икки ҳафтадан буён хат келмаяпти, кўнглим ғаш. 
— Унақа бўлса эрта-индин ўзи кириб келади. Мени айтди дерсиз. Ҳозир армиядан болалар 
қайтадиган вақт бўлди. 
Шанба-якшанба кунлари энди ишлайман, деб ўтирсам шовқин-сурон айниқса авжига чиқади. 
Скамейка жонивор худди ўчакишгандек дераза тагида... Маҳалланинг ярим боласи симга 
тизилган қалдирғочдек харракка ўтириб олади. Ўртада ойим. 
— Пошша буви, конфет беринг. 
— Пошша буви, менгаям! Йўқ, унақасиданмас, зарлигидан. 
Шу пайт, кўча бошида қарилигидан қулоқлари осилиб қолган, эчкидеккина озғин эшак 
кўринади. Ихчам араванинг ғилдиракларини ғийқиллатганча секин-секин келадию худди 
стансиясини билиб тўхтаган поезддек дераза рўпарасида тўхтайди. Қишин-ёзин оёғига маҳси 
кийиб, телпагини бостириб юрадиган қоп-қора чол «Бисмилло», деб аравадан тушади-да, 
овози борича бақиради: 
— Кеп қолинг, шара-бара-а-а! — Муштдеккина чолнинг шунчалик жарангдор овозда 
қичқиришига баъзан ҳайрон қоламиз. 
— Кеп қолинг! Зар коптокка кеп қолинг! 
Чол кафтини карнай қилиб ҳар бақирганида деразалар зириллаб кетади. 
— Ҳуштакнинг булбули ўзимизда! Сақич деганлар келаверсин! 

---

Дунёнинг ишлари (қисса). Ўткир Ҳошимов