Microsoft Word kr dunyoning ishlari ziyouz com doc

www.ziyouz.com кутубхонаси 
96
турсанг, одамсан. Бўлмаса, ўт анови ёққа, дейди, хумгазак! Бирпас ўтирсам, жанжал 
чиқадиган. Чопонни елкага ташлаб чиқиб кетавердим. Падар қусур хумгазак чўнтакниям 
қоқлаб қўйган экан. Келсам, сиз йўқсиз. Пошша ойимга ҳасратимни айтдим. «Шундоқ, шундоқ, 
мазам қочиб турибди, озгина пахмел қилмасам бўлмайди», десам, эшитишни хоҳламайдилар. 
Аврашга тушдим. «Жон пошша ойи, ҳозир ичмасам ўлиб қоламан, уволимга қоласиз, беш 
сўмгина беринг», дедим. Кўниш қаёқда! Қайтага уришиб бердилар. «Сенга ўз қўлим билан 
ичкилик обериб гуноҳга ботишга тобим йўқ, ундан кўра аччиққина мастава қилиб бераман», 
дейдилар. Ўлай агар оёқда зўрға турибман. Бошимни чангаллаб ўтиравердим. Менга қараб-
қараб қўядилар. Биламан, раҳмлари келяпти, аммо бари бир, юмшамадилар. Охири бўлмади. 
Томга чиқиб амаллаб ишга тушдиму бош қизталоқ ўзимникимас. Бир маҳал мастава пишди, деб 
чақириб қолдилар. Маставани бошимга ураманми! Минг коса маставадан кўра юз граммгина 
«оқбола»дан бўлса-ку, олам гулистон! Ҳадеб чақираверганларидан кейин тушдим. Мундоқ 
қарасам, нарвоннинг тагида ғижимланган беш сўмлик ётибди. Кўзимга олов бўлиб кўриниб 
кетди. Олдим-у қўл қизталоқ титрайди. 
— Кимники? — дедим бақириб. 
Пошша ойим овқат сузиш билан бандлар. Югуриб олдиларига бордим. 
— Кимники? — дедим пулни кўрсатиб. 
Пошша ойимнинг жаҳллари чиқиб кетди. 
— Топиб олганингдан кейин кимники бўларди, сеники-да. Нима қиласан бақириб, — деб 
уришиб бердилар. 
Абдужаббор жимиб қолди. У бир нуқтага тикилиб ўтирар, кўзларида одатдагидек шиддат эмас, 
ўйчанлик бор эди. 
— Кейин яна бир марта мазам қочганда Пошша ойим тағин беш сўм «тушириб қўйдилар», — 
деди у секин, — мен топиб олдим. 
Орага узоқ сукунат чўкди. Абдужаббор бир нуқтага тикилиб ўтирар, қовоғи солиқ эди. 
— Мана ўша ўн сўм! — У пулни мен томонга сурди. 
— Қўйинг, — дедим сидқидилдан. — Ойим сиздан рози кетганлар. 
— Олмасангиз отамнинг боласимасман! — Абдужаббор шахд билан ўрнидан турди, остонага 
борганда тўхтаб қайрилиб қаради. — Анув куни Пошша ойимни зиёрат қилгани борувдим, — 
деди овози хириллаб.— Мозор дарвозасидан қайтдим: ичган эдим. — У бир зум ерга қараб 
турди-да, қўшиб қўйди: — Бугун пайшанба, бормоқчиман. Уч кундан буён оғзимга олганим йўқ. 
У жавобимни кутмай эшикни ёпди-ю, чиқиб кетди. 
ҲАВАС 
Ҳар қандай дарднинг энг яхши давоси вақт дейдилар. Билмадим, бошқаларда шундай бўлса 
бордир. Менда... Баъзан ҳаммасини унутгандай бўламану бирон нарсадан сиқилсам, тағин 
қайтадан бошланади. Кечаси уйқум ўчганча қоронғи шифтга тикилиб ётавераман, 
ётавераман... Шунда қулоғим остида онамнинг оҳиста юпатиши эшитилади. «Қўй болам, 
ўзингни сиқма... Менга сенинг чивиндек жонинг керак. Сен учун менинг юрагим ёнганида 
бошқаларни этагининг бари ҳам куймайди, болам. Ҳеч бўлмаса мени куйдирмагин...» 
Бир вақтлар шунчаки гапдек кўринган бу сўзлар энди бошқача, жуда бошқача жаранглайди 
хаёлимда... 
Жаҳонгир деган журналист дўстим бор. Жуда дилкаш йигит. Фақат доим шошиб юради. Бугун 
Тошкентда, эртага қарасангиз Самарқандда... Хотини ўзининг тескариси: бўшашгангина жувон. 
«Жаҳон қани?» десангиз, «билмадим, Тожикистонга командировкага кетувдилар шекилли, 
янаги ҳафталарга келиб қолсалар керак», деб қўя қолади. Янаги ҳафта борсангиз, Жаҳонгир 
Туркманистонга кетган бўлади. 
Қайси куни шу ўртоғим келиб қолди. 
— Қани, отлан! — деди одатдагидек шошилиб. — Жиззахга кетдик. 

---

Дунёнинг ишлари (қисса). Ўткир Ҳошимов