Mustaqillik yillarida sportchilarimizning erishgan yutuqlaridan bazilari O’tkirbek Haydarov

Mirjalol Qosimov - 1970 yilning 17 sentyabrda Toshkent shahrida tug’ilgan. Bolaligida tengqurlari orasida o’z iste’dodi bilan ajralib turgan Mirjalolni «Chig’atoy» futbol maktabiga qabul qilishdi. Bu erda u xizmat ko’rsatgan sport ustozi Yuriy Gospadarchuk ta’limini oldi. 14 yoshidan boshlab sobiq ittifoq o’smirlar terma jamoasi tarkibida o’ynadi. U 1985-86 yillarda Moskvadagi oliy futbol maktabida tahsil oldi.
Mirjalol Qosimov o’smirlar terma jamoasi tarkibida jahon chempionatida ishtirok etdi va oltin medalni qo’lga kiritdi. 1987 yili Evropa chempioni bo’ldi. 1987-1991 yillarda u Toshkentning "Paxtakor" jamoasi sharafini himoya qildi.
1992 yili Vladikavkazning «Alaniya» jamoasi tarkibida Rossiya chempionatining kumush medalini qo’lga kiritdi. 1993 yili paxtakorchilar safida O’zbekiston kubogi sohibi bo’ldi va mamlakatning eng yaxshi futbolchisi deya e’tirof etildi. 1994 yil M.Qosimov Yaponiyaning Xirosima shahrida o’tkazilgan XII Osiyo o’yinlarida mamlakat terma jamoasining g’alaba qozonishiga munosib hissa qo’shdi. 1995 yili esa «Alaniya» futbol jamoasi tarkibida Rossiya chempionatida oltin, 1996 yili kumush medalga sazovor bo’ldi. "Paxtakor" futbol jamoasi tarkibida mamlakat chempioni, O’zbekistonning eng kuchli to’purari, 1998 yilning eng yaxshi futbolchisi degan sharafli nomlarga sazovor bo’ldi. Qosimov chet el klublari tarkibida ham O’zbekiston futbol maktabining o’ziga xos jihatlarini namoyish etib, eng yaxshi futbolchilar safidan o’rin olib kelgan. Mirjalol Qosimov ayni paytda murabbiylik faoliyatini olib bormoqda. Uning tajribasi o’zbek futboli dovrug’ini dunyoga yoyishga xizmat qilishiga shubha yo’k.
Iroda To’laganova – 1982 yilning 7 yanvarida Toshkent shahrida tug’ilgan. Tennis bo’yicha o’smirlar o’rtasida «Uimbldon» turniri g’olibi, Osiyo chempioni, Butunjahon o’smirlar o’yinlarining bronza medali sovrindori, «O’zbekiston Respublikasida xizmat ko’rsatgan sportchi», «Shuhrat» medali bilan taqdirlangan.
Iroda 9 yoshidan «Uchqun» tennis kortiga murabbiy To’lqin Shomirzaev mashg’ulotlariga qatnay boshladi. Shuningdek, chet ellardagi mashhur tennis akademiyalarida o’z mahoratini oshirdi. 1998 yili u juftlik musobaqalarida yorqin g’alabalar qozondi. Avval London turnirida, so’ngra Moskvada Butunjahon o’smirlar o’yinlarida bronza medaliga egalik qildi. 1999 yil ham Irodaning hayotida o’chmas iz qoldirdi. Dastlab Yaponiyada qizlar o’rtasida Osiyo chempioni, kattalar o’rtasida ikkita xalqaro turnir g’olibi bo’ldi. «Uimbldon» turnirining juftlik musobaqasida finalgacha etib bordi. Qizlar bahsida tengdoshlari orasida yakka peshqadamga aylandi va g’olib chiqdi. Bundan tashqari, u mamlakatimiz terma jamoasining Federatsiya kubogi bahslarida faol ishtirok etdi. Iqtidorli tennischimiz WTA turkumiga kiruvchi «Toshkent open» xalqaro turnirida ham sharafli g’alabani qo’lga kiritib, mavqeni yanada tiklab oldi. Avstriya, Belgiya, Shvetsiya, Hindiston kabi davlatlarda o’tkazilgan WTA turkumiga kiruvchi musobaqalarda muvaffaqiyat bilan qatnashdi. Natijada 2002 yilning may oyida dunyo tasnifida 16-o’ringa ko’tarildi.
Jarohatlari bois 3 yil sportdagi faoliyatiga tanaffus e’lon qilgan I.To’laganova 2006 yildan boshlab muvaffaqiyatlar yo’lini davom ettirdi. O’tgan davr ichida u “Toshkent open” va Osiyo chempionati bellashuvlarida munosib ishtirok etish baxtiga muyassar bo’ldi. Iste’dodli yosh tennischimiz Iroda To’laganova katta sportda oldiga ulkan maqsadlarni qo’ygan. Ulardan biri O’zbekistonda tennis maktabini ochishdir. Shubhasiz, o’zbek tennis malikasi Iroda To’laganovani oldinda yorqin g’alabalar kutmoqda.
2002 yilda yana olti nafar charmqo’lkop ustasi mazkur unvonni qo’lga kiritdi. Bular Ikrom Berdiev, To’lashboy Doniyorov, Sergey Mixaylov, Baxit Sarsekboev, Behzod Xidirov hamda Sherzod Husanovlardir. «O’zbekiston iftixori» faxriy unvoniga engil atletika bo’yicha iqtidorli sportchilardan biri sanalgan Leonid Andreev, yunon-rum kurashchimiz Asliddin Xudoyberganovlar ham munosib topildi.