Nashrga ruxsat etaman

ILM AL–JARH VA–T–TA’DIL – roviylarning adola­ti va zabti haqida bahs yuritib, ularning ishonchli yoki ishonchsizligi haqida yakuniy xulosa chiqaruvchi roviyga tanqidiy yondashish ilmi.

ILM AR–RIJOL –roviy haqida to‘liq ma’lumotni o‘rganuvchi hadis ilmi sohasi.

ILOHIY KITOB – Alloh tomonidan payg‘ambarlarga no­zil qilingan Zabur, Tavrot, Injil va Qur’on kitoblari.

IMON – ishonmoq, tasdiqlamoq bo‘lib, istilohda esa «La ilaha illallohu Muhammadun rasululloh» («Allohdan o‘zga iloh yo‘q va Muhammad – Allohning payg‘ambari») kalimasini til bilan aytib (al–iqror bi–l–lison), dil bilan tasdiqlash (at–tasdiq bi–l–qalb) demakdir.

INJIL – (yunoncha, «Yevangeliye») «Yangi Ahd»dagi Mark, Matto, Luqo va Yuhannolardan rivoyat qilingan kitoblar nazarda tutiladi. Ularda Iso Masihning hayot yo‘li va mo‘‘jizalari bayon qilingan.

QAVLIY SUNNAT – Rasululloh (a.s.)ning turli holat va munosabatlarda aytgan so‘zlari.

QADIMGI AHD – «Bibliya»ning qismlaridan biri. «Tav­rot» (Musoning 5 kitobi), «Zabur» va boshqa kitoblardan iborat, jami 39 kitobni o‘z ichiga oladi.

KALOM – so‘z, nutq ma’nosini bildiradi. Mo‘taziliylar paydo bo‘lgandan keyin aqida ilmining nomi «kalom» deb atala boshlangan.