Нурмат сабуров, шаҳзод сайдуллаев

Ҳуқуқий тартиботнинг хусусиятларига қуйидагилар киради:

• 
  у ҳуқуқ нормаларида кўзда тутилган бўлади;
  
• 
  муайян ҳуқуқ нормаларини ҳаётга тадбиқ этиш натижасида юзага келади;
  
• 
  давлат томонидан таъминланади;
  
• 
  кишиларнинг ҳаётини енгиллаштириб, уларнинг янада эркин бўлишлари ҳамда ижтимоий муносабатларни ташкилий жиҳатдан юзага келиши ва амалда бўлиши учун шарт-шароит яратади;
  
• 
  қонунийликнинг натижаси сифатида юзага чиқади.
  

113. ФУҚАРОЛИК ЖАМИЯТИ ТУШУНЧАСИ ВА
БЕЛГИЛАРИ


Фуқаролик жамияти – ҳар бир инсон манфаатини устувор билувчи, ҳуқуқий анъана ва қонунларга ҳурмат муҳити шакллантирилган, умуминсоний қадриятлар эъзозланадиган, инсон ҳуқуқлари ва эркинликлари сўзсиз таъминланадиган, давлат ҳокимиятининг самарали жамоатчилик назорати механизмлари вужудга келтирилган, инсоний муносабатлар чуқур маънавий-маданий қадриятларга таянадиган эркин демократик ҳуқуқий жамиятдир.
Фуқаролик жамиятининг қуйидаги асосий белгилари ва хусусиятларини кўрсатиб ўтиш мумкин:
1. Жамият ва шахс эҳтиёжлари тизимида фаол ижобий фаолият ва меҳнатнинг роли алоҳида мазмунга эга бўлиши. Меҳнатга асосланган ижтимоий эҳтиёж ва манфаатлар тизимининг қарор топиши.
2. Жамият мазмуни, унинг ривожланиш қонуниятлари моҳиятининг хусусий мулкчилик муносабатлари орқали белгиланиши.
3. Хусусий мулк барча мулк шакллари қатори равнақ топиши ва уни муҳофазалашда қонуннинг, давлат ҳокимиятининг алоҳида ўрин тутиши.
4. Фуқароларнинг юридик жиҳатдан бир хил мақомга эгалиги ва қонун олдида тенглиги. Жамиятда адолатли суд тизимининг қарор топиши ва унинг фуқароларни ҳимояловчи посбон идорага айланиши.
5. Шахснинг хусусий ҳаёти ва иқтисодий фаолиятига давлат аралашувининг қонун доирасида чекланиши. Ҳуқуқий давлатчиликнинг мавжуд бўлиши.
6. Шахснинг давлат ҳокимиятига нисбатан мулкий ва иқтисодий мустақиллиги.
7. Давлат, давлат идоралари ва фуқаролар ҳуқуқнинг тенг субъекти сифатида муносабатга кириша олиши, уларнинг судда тенг тарафлар сифатида майдонга чиқа олиши. Фуқаролар ҳуқуқларини кафолатлаш ва устувор таъминлаш механизмларининг яратилганлиги.