Oqıtıw metodları hám quralları. JobaSÍ: Oqıtıw metodı, usılı hám quralı haqqında túsinik

Awız eki oqıtıw metodları: áńgime, gúrriń, túsindiriw, sabaqlıq hám kitap penen islew, mektep lektsiyası. Ángime. Oqıw materiyalın qısqa, obrazlı, janlı hám tásirli bayan etiwge áńgime metodı delinedi. Ol áńgime-kirisiw, áńgime-bayan etiw hám áńgime-juwmaqlaw túrlerinde qollanıladı. Áńgime I-IV klasslarda 6-10 minut, V-IX klasslarda 10-20 minut dawam etiwi múmkin. Gúrrin. Gúrriń metodı awız-eki oqıtıw metodınıń negizgi túrlerinen biri bolıp, muǵallimler tájiriybelerinde kóp qollanıladı hám jaqsı nátiyjeler beredi. Onı soraw-juwap metodı depte ataydı. Sebebi oqıw materiyalın úyretiw soraw beriw hám juwap alıw túrinde alıp barıladı. Gúrriń metodı menen ótiletuǵın materiyallar oqıwshılarǵa málim dárejede tanıs bolıwı kerek, óytkeni tanıs emes materiyallardı gúrriń metodı menen úyretip bolmaydı, berilgen sorawlarǵa oqıwshılar juwap qaytara almaydı. Gúrriń metodı barlıq klasslarda hám hámme pánlerdi oqıtıwda qollanıladı. Oǵan I-IV klasslarda 8-12 minut, V-IX- klasslarda 10-25 minut ajıratılıwı múmkin. Túsindiriw. Áńgime, gúrriń metodı menen úyretiliwi qıyın materiyallar túsindiriw metodı menen úyretiledi. Túsindiriwde qaǵıydalar, rejeler, nızamlar, printsipler hám teoremalardı úyretiw dálillew xarakterinde júrgiziledi. Túsindiriw oqıwshılardıń baqlawı, muǵallimniń oqıwshılarǵa, oqıwshılardıń muǵallimge sorawı hám juwabı taqıletinde shólkemlestiriledi. Sabaqlıq hám kitaplar menen islesiw. Ol barlıq klasslarda uyımlastırıladı, ásirese ol baslawısh klasslarda úlken orın iyeleydi hám birinshi ret úyretile baslaydı, keyin ol joqarǵı klasslarda dawam etiledi. Sabaqlıq hám kitap penen islewge úyretiw sabaq protsesinde hám sabaqtan tısta alıp barıladı. Bul metod qollanılǵanda materiyal bólinip oqıtıladı, tallanadı. qıyın sózler túsindiriledi, sózlik dúzdiriledi, kórsetpeli qurallar kórsetiledi, oqıwshılar materiyaldı óz sózleri menen aytıp beredi. Mektep lektsiyası. Lektsiya metodı joqarǵı klasslarda, akademik litsey hám kásiplik kolledjlerde qollanıladı. Keń kólemli hám quramalı, dálillew menen ulıwmalasıtırıwdı talap etetuǵın oqıw materyialları lektsiya metodı menen úyretiledi. Lektsiyada bilimdi bayan etiw, dıqqattı kóbirek uslap turıw, pikirdi jedellestiriw, logikalıq yadlaw usılları, isendiriw, dáliller keltiriw, túrlerge ajıratıw, sistemalastırıw, ulıwmalastırıw keń qollanıladı.