O’zbekiston tarixi 7-sinf

Rivojlantiruvchi: O`quvchilarni bilim va ko’nikmalarini rivojlantirish
Dars turi: aralash
Dars uslubi: og’zaki, yozma
Dars usuli: ma’ruza, savol-javob, test, aqliy hujum
Dars jihozi: elektron darslik, darslik, doska, xarita, chizma va tarqatma materiallar, taqdimot
Darsning texnologik xaritasi:
I.Tashkiliy qism 2 daqiqa
II. O’tgan mavzuni so’rash 10 daqiqa
III.Yangi mavzu mazmunini yoritish 12 daqiqa
IV.Yangi mavzuni mustahkamlash 15 daqiqa
V.O’quvchilarni baholash 4 daqiqa
VI.Uyga vazifa berish 2 daqiqa
Darsning borishi:
I. Tashkiliy qism:
O’quvchilar bilan salomlashish, davomadni aniqlash,darsga jalb qilish,sinfda ishchi muhitini yaratish, dunyoda va O`zbekistonda yuz bergan muhim yangiliklardan qisqacha xabarlar berish.


II. O’tgan mavzuni so’rash :


1.Qaysi ikki so'z oliy darajali hukmdor ma'nosini anglatgan?
A.bug'roxon va go'rxon B.arslonxon va bug'roxon C.bug'roxon va tamg'achxon D.barchasi to'g'ri
2.Qoraxoniylar davlati tugatilgan yilni aniqlang.
A.1137-yil B.1141-yil C.1127-yil D.1017-yil
3.Qachondan boshlab "dehqon" degan tushuncha o'zining “qishloq hokimi”ni anglatuvchi asli ma'nosini yo'qotdi?
A.X-X asrlarda B.XI-XII asrlarda C. X-XII asrlarda D. IX-X asrlarda
4.Qachondan boshlab yerdan foydalanishda iqto' tartiboti juda keng yoyiladi?
A.X asrdan boshlab B.XII asrdan boshlab C.XI asrdan boshlab D.X-XI asrdan boshlab
III. Yangi mavzu bayoni:
Xorazmshohlar davlati IX-X asrlarda tohiriy, safforiy va somoniylar qo‘l os­tida bo‘lgan. X asr oxirlarida Xorazm iqtisodiy jihatdan yana tez rivojlana boshlagan. X asrning oxi riga borganda VIII asr boshlaridagi mavjud uchta shaharlarning soni o‘ttiz ikkitaga yetgan. X-XI asrlarda Xorazm mintaqadagi yirik savdo markazlaridan biriga aylangan. Xorazm savdogarlari chorvadorlar (hozirgi Turkmaniston va Qozog‘iston) hamda Itil (Volga) bo‘yidagi Xazar va Bulg‘or podsholiklari, shuning­dek, Sharqiy Yevropaning slavyan aholisi bilan savdo-sotiq olib borganlar. Savdo aloqalarining kengayishida ayniqsa, Gurganch (Urganch) shahri muhim rol o‘ynagan. Uning hokimi «Gurganch miri» nomi bilan ulug‘langan.
995-yilda Gurganch miri Ma’mun ibn Muhammad Kat shahrini ishg‘ol qilib, Xorazmning ikkala qismini birlashtirdi va Xorazmshoh unvoniga sazovor bo‘ldi. Shu tariqa afrig‘iylar sulo­lasi barham topib, ma’muniylar hukmronligi boshlandi. Ko‘hna Urganch Xorazmshohlar davlatining poytaxtiga aylandi. Qisqa davr ichida ma’muniylar Xorazmshohlar davlatini ijtimoiy, si­yosiy, iqtisodiy va madaniy jihatdan rivojlantirdilar. Mamlakat viloyat, shahar va qishloq (qal’a)larga ajratilib boshqarildi.
Xorazmshoh davlatning oliy va mutlaq hokimi hisoblanardi. Gurganchda shoh qarorgohi, markaziy boshqarma-devonxona tashkil etildi. Uning tarkibida ziroat, savdo-tijorat, moliya, soliq, shahar va qishloqlarda osoyishtalikni saqlash uchun harbiy ishlar bilan shug‘ullanadigan mahkamalar faoliyat ko‘rsatgan. Davlat­ning eng yuqori lavozimlaridan biri vazirlik - xo‘jayi buzruk unvoniga ega bo‘lgan. U devonxona ishlariga mas’ul bo‘lgan. Ma’muniylar davrida Xorazmda ilm-fan va madaniyat ravnaq topib, Ma’mun akademiyasi - «Dorul hikma va maorif» («Bilimdonlik va maorif uyi») tashkil etiladi. Ushbu ilmgohda buyuk qomusiy olimlar ijod etganlar, o‘z kashfiyot va asarlari bilan Xorazmshohlar davlatining mavqeyini yuksak darajaga ko‘targanlar. Biroq bu madaniy yuksalish uzoq davom etmagan.
1017-yilda Mahmud G‘aznaviy tomoni­dan zabt etilib, o‘z mustaqilligidan mahrum bo‘lgan Xorazm ko‘p vaqt o‘tmay (1040) Saljuqiylar davlatiga qaram bo‘lib qoladi. Saljuqiylar hukmdori Malikshoh o‘z ma’murlaridan Anushteginni Xorazmga noib qilib tayinlaydi. Anushtegin vafotidan so‘ng Xorazmda uning vorisi Qutbiddin Muhammad (1097-1127) noiblik qiladi. Garchi u «xorazmshoh» unvonini tiklab, bunday jarangdor nom bilan ulug‘lansa-da, Saljuqiylar davlatining sadoqatli noibiligicha qolgan edi. Xorazmning mustaqilligi Qutbiddin Muhammadning o‘g‘li Otsiz (1127-1156) nomi bilan bog‘liqdir.
Otsizning siyosatini uning vorislari El- arslon (1156-1172), Sultonshoh Mah­mud (1172) va Takash (1172-1200) da­vom ettiradilar. XII asrning ikkinchi yarmida Movarounnahr va Xurosonda siyosiy vaziyat yanada keskinlashadi. 1153-yilda Sulton Sanjarga qarshi ko‘chmanchi o‘g‘uzlar isyon ko‘taradilar. Buning oqibatida Saljuqiylar davlati keskin zarbaga uchrab, zaiflashib qoladi.
Dastavval undan Kichik Osiyo va Kermon ajralib ketadi. So‘ngra Fors, Ozarbayjon va Xuroson viloyatlari mustaqil bo‘lib oladi. Bunday siyosiy vaziyatda, shubhasiz, Xorazmning hukm­ronlik doirasi kengaytirilib, uning mustaqilligi yanada mustahkamlanadi. Xorazm davlati, ayniqsa, Otsizning nabirasi Takash davrida juda kengayadi. 1187-1193-yillarda u Nishopur, Ray va Marv shaharlarini zabt etadi. 1194-yilda esa saljuqiylar sultoni To‘g‘rulga qaqshatqich zarba berib, Eronni Xorazmga bo‘ysundiradi.
Takashdan so‘ng uning o‘g‘li Alovuddin Muhammad (1200-1220) ham Xorazm davlatini kengaytirish siyosatini davom ettiradi. 1206-yildan boshlab Movarounnahrni qoraxitoylarning qaramligidan ozod etishga kirishildi. 1210-yilda Talos vodiysida qoraxitoylar mag‘lubiyatga uchraydi. Yettisuvgacha bo‘lgan yerlar Xorazmshohlar davlati tasarrufiga o‘tadi.XIII asr boshida Xorazm juda keng maydonni egallagan buyuk davlatga aylangan edi. Uning shimoli g‘arbiy va g‘arbiy chegarasi Orol va Kaspiy dengizi sohillaridan janubi g‘arbda Iroqqa qadar borar edi. Janubi sharqiy hududlari G‘azna viloyatidan, shimoli sharqiy chegarasi esa Yettisuv va Dashti Qipchoqdan o‘tar edi.
Sharqdagi bu ulkan davlatning poytaxti Urganch shahri edi. Hukmdor Muhammad Xorazmshoh esa «Iskandari soniy» deb ulug‘langan. Uning saroyida 27 hukmdor va ularning vakillari doimo itoatda bo‘lgan. Mamlakat qoraxitoylar zulmidan qutulgan bo‘lsa-da, mehnatkash aholining ahvoli yengillashmadi. Aksincha, xorazmshohlarning harbiy yurishlari, soliq siyosatidagi beboshlik, amir va ma’murlarning jabr-u zulmi mamlakat fuqarolarining moddiy ahvolini g‘oyat og‘irlashtirdi, xalq xo‘jaligini yanada zaiflashtirdi. Bu, shubhasiz, shahar va qishloq aholisining Xorazmshohga qarshi noroziligini oshirdi. Natijada, 1210-yilda O‘tror aholisi, 1212- yilda esa samarqandliklar qo‘zg‘olon ko‘tardilar. Muhammad Xorazmshoh qo‘zg‘olonlarni shafqatsizlik bilan bostiradi.