Педагогик атамалар луғати

Араб тили ўқитиш методикаси – 1) араб тили таълими назарияси ҳамда методикаси бўйича талабаларга муайян билим, кўникма, малакалар ҳосил қилишга йўналтирилган ўқув фани; 2) араб тили ўқитиш методикаси хусусий педагогиканинг асосий сохаси.
Арифметика – ўқувчиларга математик сонларнинг оддий хоссаларини ҳамда улар устида бажариладиган амалларни ўргатадиган ўқув фани.
Архив методи – кундалик қайдномалар ва ёзувлар, архив маълумотлар, меҳнат ёки ижодий фаолиятни таҳлил қилувчи тадқиқот тури.
Асл манба – бирор асар ёки матннинг шарҳланмаган, бошқа тилга таржима, таҳрир қилинмаган (муаллиф тузатишлари ва таҳрири бундан мустасно) асл нусхаси.
Аспирант – олий таълимдан кейинги юқори босқичда таълим олиб, муайян соҳада номзодлик илмий даражасини олиш учун фаолият кўрсатадиган шахс.
Аспирантура – олий ўқув юртлари ёки илмий текшириш институтлари ҳузурида фан номзоди даражасидаги юқори малакали ўқитувчилар ёки илмий кадрлар тайёрлашга ихтисослашган ўқув муассасаси.
Ассистент (лот.- assistens - ёрдам берувчи) – 1) мутахассис ёрдамчиси, профессор ёки доцентларга кўмаклашадиган кичик мутахассис (масалан: профессор ассистенти); 2) олий ўқув юртларида илмий унвон ва ўқитувчилик лавозими.
Астрономия – ўқувчиларга осмон жисмлари тўғрисида илмий тушунча ҳосил қиладиган ўқув фани.
Астраномия ўқув предмети – коинотда осмон жисмларининг жойлашиши ва ривожланишини илмий жиҳатдан ўқувчиларга ўргатадиган ўқув предмети.
Атама – билим ёки фаолиятнинг махсус соҳасига доир тушунчани ифодаловчи сўз ёки сўз бирикмаси.
Атрофлича фикрлаш – муайян масалани тафаккур воситаларидан фойдаланиб, атрофлича босқичма-босқич ҳал қилишдан иборат ақлий фаолият.
Аттестат – 1) ўқув муассасасини тугатганлиги тўғрисидаги давлат ҳужжати. Етуклик аттестати-умумий ўрта мактабни битириб чиққан ўқувчиларга бериладиган давлат ҳужжати; 2) илмий ёки махсус унвон берилганлик тўғрисидаги шаҳодатнома. Профессорлик аттестати. Катта илмий ходимлик аттестати.
Аттестация – 1) мутахассисларнинг ишга лаёқати, малакасини, билим даражаси ва хулқ атворини аниқлаш ва шу асосда ишга тайинлаш ёки унвон бериш учун ўтказиладиган синов; 2) Ўзбекистон Республикасининг “Таълим тўғрисида”ги Қонуни ва “Кадрлар тайёрлаш миллий дастури” ва бошқа меъёрий ҳужжатлар талаблари асосида муайян таълим муассасаси фаолиятининг асосий йўналишлари: моддий-техник базаси, кадрлар билан таъминланганлиги, ўқув-тарбиявий ишларнинг ташкил этилиши, бошқарув даражаси, ўқув услубий таъминоти, ўқувчилар ва талабалар билим даражаси ва бошқа қатор кўрсаткичлар бўйича давлат таълим стандартларига нечоғлиқ мувофиқ эканлигини аниқлаб берувчи жараён.