Tibbiy-mehnat ekspert komissiyalari tomonidan fuqarolarni tibbiy ko‘rikdan o‘tkazish tartibini yanada takomillashtirishga, nogironlikni va kasbiy mehnatga layoqat yo‘qotilishi darajasini aniqlashga yo‘naltirilgan normativ-huquqiy hujjatlarni tasdiqlash

II. Fuqarolarni tibbiy ko‘rikdan o‘tkazishga qabul qilish
6. TMEK tibbiy ko‘rikdan o‘tkazishga O‘zbekiston Respublikasi fuqarolarini, O‘zbekiston Respublikasi hududida doimiy yashaydigan xorijiy fuqarolarni va fuqaroligi bo‘lmagan shaxslarni, 16 yoshdagi va undan katta yoshdagi, DPM yo‘llanmasiga ega bo‘lgan, ushbu TMEKga biriktirilgan shaxslarni qabul qiladi.
16 yoshgacha bo‘lgan nogiron bolalarni tibbiy-mehnat ekspert komissiyalarida tibbiy ko‘rikdan o‘tkazish qoidalari O‘zbekiston Respublikasi Moliya vazirligi va Sog‘liqni saqlash vazirligi tomonidan belgilanadi.
(6-bandining ikkinchi xatboshisi O‘zbekiston Respublikasi Vazirlar Mahkamasining 2016-yil 7-iyundagi 189-sonli qarori tahririda — O‘R QHT, 2016-y., 24-son, 281-modda)
Tibbiy ko‘rikdan o‘tkazishning sifati, o‘z vaqtidaligi va bemorlarni TMEKga yuborishning asoslanganligi yuzasidan javobgarlik DPM rahbari zimmasiga yuklanadi.
Tibbiy hujjatlarda TMEKning noto‘g‘ri xulosasini chiqarishga asos bo‘lgan yolg‘on ma’lumotlarni qasddan ko‘rsatishgan shaxslar, shuningdek yolg‘on xulosalar berishgan yoki nogironlik guruhini ataylab noto‘g‘ri belgilashgan vrachlar va ekspertlar ham qonun hujjatlarida belgilangan javobgarlikka tortiladilar.
7. Boshlang‘ich tibbiy ko‘rikdan o‘tkazishga:
aynan bir kasallik tufayli vaqtincha mehnatga layoqatsizlik boshlangan kundan boshlab uzluksiz muddat qatorasiga 4 oydan ortiqni tashkil qiladigan uzoq muddat kasal bo‘lgan (sil kasalligiga chalingan bemorlardan tashqari) shaxslar;
aynan bir kasallik tufayli vaqtincha mehnatga layoqatsizlik davri vaqtincha mehnatga layoqatsizlik boshlangan kundan e’tiboran 12 oy mobaynida tanaffus bilan birga 6 oy mobaynida davom etgan shaxslar (sil kasalligiga chalingan bemorlardan tashqari);
sil kasalligi birinchi marta aniqlangan, vaqtincha mehnatga layoqatsizlik davri kasallik aniqlangan kundan boshlab kamida 10 oyni tashkil qiladigan, shuningdek asosiy kasallik kuchaygan-vaqtincha mehnatga layoqatsizlik boshlangan kundan e’tiboran kamida 6 oy silga qarshi kurashish muassasalarida hisobda turgan taqdirda sil kasalligiga chalingan bemorlar qabul qilinadi.
Nogironlik belgilari aniq ko‘rinib turgan shaxslar, shuningdek noxush klinik prognozli bemorlar yuqorida ko‘rsatib o‘tilgan muddatlar o‘tgungacha tibbiy ko‘rikdan o‘tkazishga qabul qilinishi mumkin. Ushbu shaxslarni tibbiy ko‘rikdan o‘tkazishga qabul qilish to‘g‘risidagi qaror TMEK raisi tomonidan chiqariladi.
8. TMEKda tibbiy ko‘rikdan o‘tish uchun pasport yoki shaxsni tasdiqlovchi boshqa hujjat majburiy tartibda ko‘rsatiladi.
TMEKda tibbiy ko‘rikdan o‘tish uchun:
DPM yo‘llanmasi, davolovchi vrach, bo‘lim mudiri, bosh vrach imzosi va muassasaning dumaloq muhri bilan tasdiqlangan kasallik tarixidan ko‘chirmalar (mavjud bo‘lsa), ambulatoriya kartasi;
(8-bandning uchinchi xatboshisi O‘zbekiston Respublikasi Prezidentining 2021-yil 28-iyulodagi PQ-5199-sonli qarori tahririda — Qonunchilik ma’lumotlari milliy bazasi, 29.07.2021-y., 07/21/5199/0721-son)
ishlaydiganlar tomonidan – vaqtincha mehnatga layoqatsizlik varaqasi taqdim etiladi.
Kasbiy kasallik oqibatida kasbiy mehnatga layoqat yo‘qotilganligi darajasi va nogironlik aniqlangan taqdirda TMEKga tibbiy ko‘rikdan o‘tish uchun qonun hujjatlariga muvofiq maxsus vakolat berilgan sog‘liqni saqlash muassasasi xulosasidan ko‘chirma ham taqdim etiladi.
Kasbiy mehnat layoqati yo‘qotilganligini aniqlash uchun TMEKga birinchi marta yuborilgan shaxslar mehnat vazifalarini bajarish bilan bog‘liq holdagi baxtsiz hodisa yoki sog‘liqning boshqacha tarzda shikastlanganligi to‘g‘risida belgilangan shakldagi dalolatnomani ham taqdim etadilar.
9. Ayrim hollarda, zaruriyat paydo bo‘lganda TMEK ish beruvchilardan tibbiy tekshirishdan o‘tuvchining mehnatda jarohatlanishga yoki kasb bo‘yicha kasallanishiga sabab bo‘lgan mehnat xarakteri va sharoitlari to‘g‘risidagi xulosani so‘rab olishi mumkin. Bunda ish beruvchi tomonidan xulosani o‘z vaqtida taqdim etmaslik yoki taqdim etmaslik tibbiy tekshirishdan o‘tkazishni rad etish yoki tibbiy tekshirish muddatini uzaytirish uchun asos bo‘la olmaydi.
10. Tibbiy ko‘rik:
yashash joyidagi TMEK yoki DPMga biriktirilgan joydagi TMEK yoki ushbu TMEKga biriktirilgan tegishli DPMning yo‘llanmasi bo‘yicha o‘tkazilishi;
agar TMEK joylashgan joyda tibbiy tekshirishni asosli sabablarga ko‘ra va DPM tavsiyasi asosida o‘tkazish mumkin bo‘lmasa – uyda yoki statsionarda ko‘chma majlislarda o‘tkazilishi mumkin.
Tibbiy ko‘rik hujjatlar TMEKda qabul qilingan kundan boshlab ikki hafta muddatda o‘tkaziladi. Nogironlik belgilangan taqdirda hujjatlar TMEKda qabul qilingan sana nogironlikning boshlanishi hisoblanadi.