Ózbekstan Respublikasındaǵı ekonomikalıq, jámiyetlik-siyasiy waqıyalarǵa baylanıslı maǵLÍwmatlar

Oraylıq Aziya mámleketleri hám Germaniya jetekshileriniń birinshi sammiti


Ózbekstan Respublikası Prezidenti Shavkat Mirziyoev Germaniya Federal Kancleri Olaf Shol'ctiń mirát etiwine bola ámeliy sapar menen Berlin qalasına bardı.
Mámleketimiz basshısı Germaniyaǵa ámeliy saparı sheńberinde 29-sentyabr' kúni Oraylıq Aziya mámleketleri basshılarınıń Germaniya Federal Prezidenti Frank-Val'ter Shtaynmayer menen ushırasıwında qatnastı.
Ilajda Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov, Tájikstan Respublikası Prezidenti Emomali Rahmon, Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedov ta qatnastı.
Ushırasıwda konstruktivlik siyasiy pikirlesiwdi bekkemlew, sawda-ekonomikalıq, transport-kommunikaciyalıq hám mádeniy-gumanitarlıq birge islesiwdi keńeytiw máseleleri dodalandı.
Regionallıq qáwipsizlik hám turaqlı rawajlanıwdı, sonıń ishinde, Evropa Aўqamı baǵdarlamaları sheńberinde támiyinlewdiń áhmiyetli tárepleri boyınsha pikir alısıldı.
Mámleketimiz basshısı óz sózinde «Oraylıq Aziya – Germaniya» formatındaǵı birge islesiw perspektivalarına ayrıqsha toqtap ótti. Ámeliy birge islesiwdiń tiykarǵı baǵdarlarına, bárinen burın, joqarı texnologiyalar hám innovaciyalıq rawajlanıw, transport kommunikaciyaları, «jasıl» energetika, kásiplik tálim, jedel mádeniy hám akademiyalıq almasıwlarǵa ayrıqsha itibar qaratıldı.
Germaniyanıń jetekshi kompaniya hám bankleri Ózbektandaǵı jumısın keńeytip atırǵanı úlken qanaatlanıwshılıq penen atap ótildi. Jaslarımızda nemis tiline qızıǵıwshılıq artıp atırǵanı atap ótildi – házirgi kúnde elimizde onı derlik 300 mıń mektep oqıwshıları hám studentler úyrenbekte.
Sóylesiwde Germaniya Federal Prezidenti Ózbekstan jetekshisin Berlin qalasındaǵı dún'yaǵa belgili Jeyms Simon galereyasında biybaha mádeniy-tariyxıy kórgizbe tabıslı ótkerilgeni menen qutlıqladı. Bir neshe ay ishinde kórgizbege 200 mıń berlinliler hám Germaniya paytaxtınıń miymanları keldi.
Bunnan soń Ózbekstan Respublikası Prezidenti Shavkat Mirziyoev hám Germaniya Federal Prezidenti Frank-Val'ter Shtaymayerdiń eki tárepleme ushırasıwı bolıp ótti.
Ózbekstan menen Germaniya arasındaǵı kóp táreplemeli qatnasıqlardı, bárinen burın, innovaciya hám texnologiyalar, «jasıl» ekonomika, qolaylı energetika, transport hám logistika, bilimlendiriw hám mádeniyat tarawlarında rawajlandırıwdıń áhmiyetli máseleleri kórip shıǵıldı.
Usı jılı may ayında Germaniyaǵa ámeliy sapar dawamında ótkerilgen nátiyjeli sóylesiwlerde erisilgen kelisimlerdi ámelge asırıw boyınsha birgeliktegi háreketlerdi dawam ettiriw zárúr ekenligi atap ótildi.
Prezidentler regionallıq kún tártibi boyınsha da pikir alıstı, sonıń ishinde, «Oraylıq Aziya – Germaniya» formatında ámeliy birge islesiwdi jolǵa qoyıw zárúr ekenligin atap ótti.
Ózbekstan Respublikası Prezidenti Shavkat Mirziyoev Germaniya Federativ Respublikası Federal Kancleri Olaf Shol'ctiń basshılıǵında ótken Oraylıq Aziya mámleketleri hám Germaniya jetekshileriniń birinshi sammitinde qatnastı.
Ilajǵa Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov, Tájikstan Respublikası Prezidenti Emomali Rahmon hám Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedov ta qatnastı.
Sammit kún tártibine muwapıq, sawda-ekonomikalıq hám mádeniy-gumanitarlıq birge islesiwdi keńeytiw, «jasıl» energetikanı rawajlandırıw hám klimat ózgerislerine beyimlesiw perspektivaları, tábiyǵıy resurslar hám qorshaǵan ortalıqtı qorǵaw máseleleri sonday-aq, turaqlı hám úzliksiz regionallıq rawajlanıwdı támiyinlew baǵdarında birgeliktegi háreketler dodalandı.
Ilaj qatnasıwshıları «Oraylıq Aziya – Germaniya» formatı ashıq pikirlesiw hám region mámleketleri menen Germaniya arasındaǵı birge islesiwdiń jańa kún tártibin qáliplestiriw ushın nátiyjeli ortalıqqa aylanǵanın atap ótti.
Mámleketimiz basshısı Oraylıq Aziyada házirgi kúngi regionallıq birge islesiw dárejesine joqarı baha berip, Ózbekstan jaqsı qońsıshılıq, óz-ara isenim hám birge islesiwdi bekkemlew siyasatın buljıtpay ámelge asırıp atırǵanın atap ótti.
Region mámleketlerine ǵárezsizliktiń birinshi kúnlerinen-aq ámeliy járdem kórsetiwde Germaniya áhmiyetli orın iyelep kiyatırǵanı joqarı bahalandı.
Atap ótilgenindey, búgin mámleketimiz áhmiyetli transformaciya basqıshında tur, Jańa Ózbekstan – insan mápleri joqarı qádiriyat bolǵan demokratiyalıq mámleketti qurıw jolınan barmaqta. Mámleketimizdi 2030-jılǵa shekem rawajlandırıw boyınsha uzaq múddetli strategiya qabıl etilgen hám ondaǵı joqarı maqsetler xalıqaralıq birge islesiwshilerdiń potencialın tartıw arqalı ámelge asırıladı.
Uzaq múddetli birge islesiwdiń ulıwma regionallıq áhmiyetke iye tiykarǵı baǵdarları kórsetip ótildi.
Olar – investiciyalıq, innovaciyalıq hám texnologiyalıq baylanıslar hám almasıwdı rawajlandırıw, qayta tikleniwshi energiya dáreklerin engiziw, shiyki zat resursların tereń qayta islew, transport-kommunikaciyalıq óz-ara baylanıslılıqtı kúsheytiw, «jasıl» kún tártibin ámelge asırıw, Germaniya standartlarına muwapıq hár qıylı tarmaqlar ushın qánigelerdi tayarlaw, Aўǵanstan xalqına gumanitarlıq járdem kórsetiw.
Oraylıq Aziya mámleketleriniń jetekshileri Germaniya tárepiniń Oraylıq Aziya hám Germaniya arasında strategiyalıq regionallıq sheriklikti jolǵa qoyıw, bul formatta turaqlı ushırasıw hám másláhátlesiwler alıp barıw usınısın qollap-quwatladı.
Ózbekstan Respublikası Prezidenti Shavkat Mirziyoev birinshi «Oraylıq Aziya – Germaniya» sammiti sheńberinde Germaniya Federativlik Respublikasınıń Kancleri Olaf Shol'c penen sóylesiw ótkerdi.
Eki tárepleme qatnasıqlardıń áhmiyetli tárepleri kórip shıǵıldı, Ózbekstan menen Germaniya arasındaǵı kóp táreplemeli birge islesiwdi jáne de rawajlandırıw máseleleri dodalandı.
Isbilermenlik tarawındaǵı sheriklikti keńeytiw, ekonomika, investiciya, transport, energetika hám basqa da tarawlarda kooperaciyanı tereńlestiriwge ayrıqsha itibar qaratıldı.
Ózbekstan basshısınıń usı jılı may ayındaǵı Berlinge saparı eki tárepleme qatnasıqlardı jedellestiriwge kúshli pát baǵıshlaǵanı atap ótildi.
Keyingi jılları tovar almasıw hám sanaat kooperaciyasınıń kórsetkishleri eki esege ósti. Mámleketimizde Germaniyanıń “Volkswagen”, “MAN”, “CLAAS”, “Siemens”, “Linde”, “Aurubis”, “Henkel”, “Knauf”, “Papenburg”, “Deutsche Kabel” hám basqa da kóplegen jetekshi kompaniyaları tabıslı jumıs alıp barmaqta.
Taw-kán, energetika, ximiya, elektrotexnika, toqımashılıq sanaatı hám infrastruktura boyınsha joybarlar portfeli qáliplestirilgen.
Mámleketimiz basshısı birgeliktegi ekonomikalıq ilajlardı turaqlı ótkerip barıw, qolaylı energetikanı rawajlandırıw, awıl xojalıǵı hám suw resursların basqarıwdı sanlastırıw, shiyki zattı tereń qayta islew, qarjı mexanizmlerin keńeytiw, eki mámleket aymaqları arasındaǵı baylanıslardı bekkemlew, migraciya hám kóshiw tarawında birge islesiw boyınsha bir qatar anıq usınıslardı alǵa qoydı.
Mádeniy-gumanitarlıq almasıwdı rawajlandırıw, ilim hám bilimlendiriw tarawlarında birgeliktegi baǵdarlamalardı ámelge asırıwdan eki tárep te mápdar ekeni atap ótildi.
Regionallıq qáwipsizlikti támiyinlew boyınsha, sonıń ishinde, Aўǵanstandaǵı jaǵdaydıń rawajlanıwı kózqarasınan pikir alısıldı.
Ushırasıw sońında Ózbekstan Respublikası Prezidenti Shavkat Mirziyoev Germaniya Federal Kancleri Olaf Shol'cti rásmiy sapar menen mámleketimizge keliwge mirát etti.
Ózbekstan Respublikası Prezidenti Shavkat Mirziyoev Germaniya ekonomikası Shıǵıs komiteti qáwenderliginde shólkemlestirilgen Ekonomikalıq forum jumısında qatnastı.
Ilajda Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov, Tájikstan Respublikası Prezidenti Emomali Rahmon, Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedov ta qatnastı.
Germaniya tárepinen ayrıqsha tapsırmalar boyınsha federal ministr, Federal Kancler administraciyasınıń basshısı Vol'fang Shmidt, Ekonomika hám klimattı qorǵaw federal ministrligi mámleketlik xatkeri Udo Flipp, Germaniya ekonomikası Shıǵıs komiteti baslıǵı Katrina Klaas-Myul'xoyzer qatnastı.
Bunnan tısqarı, forum jumısında “CLAAS”, “Siemens Energy”, “Knauf”, “Linde”, “Papenburg”, “BayWa”, “WILO”, “IPEX-Bank”, “Commerzbank”, “AKA”, “Mangold Consulting”, “Deutsche Bahn”, “DB E.C.O.”, “Euler Hermes”, “Ernst Klett”, “SMS Group”, “Deutsche Bank”, “Evonik Industries”, “John Deere”, “BASF”, “Airbus” sıyaqlı Germaniyanıń jetekshi kompaniya hám bankleriniń basshıları qatnastı.
Ózbekstan jetekshisi búgingi ilaj Germaniya biznesinde Oraylıq Aziya mámleketleriniń bazarındaǵı jumısın keńeytiwge qızǵıwshılıq artıp baratırǵanınan dárek ekenin úlken qanaatlanıwshılıq penen atap ótti.
Investiciyalıq, innovaciyalıq hám texnologiyalıq birge islesiw máseleleri, joqarı texnologiyalıq tarmaqlarda, sonday-aq, «jasıl» energetika, shiyki zat resursların tereń qayta islew, logistika hám transport, kadrlar tayarlaw boyınsha kooperaciyalıq joybarlardı ámelge asırıw perspektivaları kórsetip ótildi.
– Biz sizler menen birgelikte mámleketimiz ekonomikasınıń jetekshi tarmaqların modernizaciyalaw boyınsha úlken jumıs alıp barmaqtamız, nátiyjeli qosımsha qun shınjırları hám mıńlaǵan jańa jumıs orınların jaratpaqtamız. Biz ashıq pikirlesiw ushın jańa maydanlar hám turaqlı platformalar payda bolıwınan mápdarmız,-dedi Prezidentimiz.
Keyingi jılları Ózbekstan menen Germaniya arasındaǵı sawda-ekonomikalıq hám investiciyalıq qatnasıqlar rawajlanıp atırǵanı qanaatlanıwshılıq penen atap ótildi. Birgeliktegi joybarlar hám kárxanalar sanı eki esege kóbeydi.
– Barlıǵıńız kóp táreplemli Ózbekstan – Germaniya qatnasıqların rawajlandırıw ushın haqıyqatında úlken úles qosıp atırsız, joybarlarıńız bolsa uzaq múddetli tabıslı birge islesiwge mısal bola aladı. Men onı júdá qádirleymen,-dedi mámleketimiz basshısı.
Mámleketimiz jetekshisi Germaniya kompaniyaları menen birge islesiwdi jáne de keńeytiwdiń tiykarǵı táreplerine toqtap ótip, bir qatar perspektivalı baǵdarlardı kórsetip ótti.
Bul, bárinen burın, kooperaciyanı rawajlandırıw sonday-aq, Germaniya kompaniyalarınıń Ózbekstandaǵı jumısın keńeytiw bolıp esaplanadı. Mámleketimiz basshısı bazarda ótimli sanaat ónimlerin islep shıǵarıw ushın úlken imkaniyatlar bar ekenligin atap ótti.
Regionallıq joybarlardı qollap-quwatlaw maqsetinde Prezidentimiz Ózbekstanda Germaniya jetekshi islep shıǵarıwshılarınıń joqarı sanaat texnologiyaları boyınsha Oraylıq Aziya kórgizbesin ótkeriw usınısın bildirdi.
Sherikliktiń eń áhmiyetli baǵdarlarınan biri – «jasıl» energetika. Ózbekstan basshısı qolaylı energetikanı rawajlandırıw baǵdarında germaniyalı sherikler menen tabıslı tájiriybe hám perspektivalı kooperaciyalıq joybarları bar ekenligin atap ótti.
Region dárejesinde «jasıl» ekonomika joybarların ámelge asırıw ushın Germaniya injenerlik-joybarlastırıw orayları hám sanaat xoldingleri menen birge islesiw baǵdarlamasın islep shıǵıw hám qabıl etiw usınıs etildi.
Prezidentimiz eń áhmiyetli shiyki zat resursları tarawında olardı qayta islewge aldıńǵı texnologiyalıq sheshimlerdi tartıw hám sanaat ónimleriniń eksportın shólkemlestiriw boyınsha birgeliktegi joybarlar zárúr ekenligin atap ótti.
Azıq-awqat qáwipsizligi máselelerine ayrıqsha itibar qaratıldı.
– Oraylıq Aziya ishki talaplardı tolıq támiyinlew hám Evropa mámleketlerine sapalı azıq-qawqat ónimlerin eksport etiw ushın zárúr potencialǵa iye,-dedi mámleketimiz basshısı.
Usı mánide, elimiz awıl hám suw xojalıǵı tarawlarına Germaniya kompaniyalarınıń energiya únemlewshi hám sanlı texnologiyaların tartıwǵa tayar ekeni atap ótildi.
Azıq-awqat tarawında birgeliktegi regionallıq ilajlar ótkeriw usınıs etildi.
Prezidentimiz transport hám logistika baǵdarındaǵı birge islesiwge de toqtap ótti. Oraylıq Aziyanı Evropa menen baylanıstıratuǵın nátiyjeli baǵdarlardı rawajlandırıw zárúr ekenligi atap ótildi. Transport joybarların ekspertiza jaǵınan qollap-quwatlaw ushın Germaniyanıń jetekshi shólkem hám kompaniyalarınıń qánigelerin tartıw usınısı bildirildi.
Maman qánigelerdi tayarlaw baǵdarındaǵı baslamalardı qollap-quwatlaw kóp táreplemeli Ózbekstan – Germaniya birge islesiwin rawajlandırıwdıń áhmiyetli baǵdarı sıpatında atap ótildi.
Sońında mámleketimiz basshısı Ózbekstandaǵı isbilermenlik baslamaları hám birgeliktegi investiciyalıq joybarlarǵa hár tárepleme járdemlesiwge tayar ekenligini tastıyıqlap, Oraylıq Aziya Germaniya biznesi ushın úlken imkaniyatlar regionı ekenin atap ótti.