Ózbekstan Respublikasındaǵı ekonomikalıq, jámiyetlik-siyasiy waqıyalarǵa baylanıslı maǵLÍwmatlar

Ózbekstan Prezidenti “Power International Holding” penen keń kólemli sheriklikti rawajlandırıwdı qollap -quwatladı


Ózbekstan Respublikası Prezidenti Shavkat Mirziyoev 1-oktyabr kúni Doha qalasında ózine ajıratılǵan sarayda “Power International Holding” kompaniyası basqarıwı balıǵı Mutaz al-Hayyattı qabıl etti.
“Power International” – dúnyanıń 19 mámleketinde energetika, neft-ximiya, sanaat, awıl xojalıǵı, transport infrastrukturası, densawlıqtı saqlaw, turizm sıyaqlı tarawlarda aktiv jumıs alıp baratırǵan Qatardıń eń úlken milliy xoldingi. Jaqın Shıǵıstaǵı jetekshi kóp tarmaqlı kompaniyalardan biri bolıp tabıladı.
Búgin bul kompaniya menen sheriklikte Jizzaq wálayatında keleshekte regionnıń eń úlken agrosanaat kompleksi bolatuǵın zamanagóy sharwashılıq klasteri qurılıp atır.
Mámleketimizde joqarı tezlikte háreketleniwge mólsherlengen avtomobil magistralın qurıw, ammiak hám karbamid islep shıǵarıw kólemin arttırıw, isbilermenlik hám miymanxana infrastrukturası, densawlıqtı saqlaw obyektlerin shólkemlestiriw perspektivalı joybarlar retinde atap ótildi.
Qatar tárepi tez arada xolding Ózbekstanda óz ofisin ashıwın xabarladı.
Ózbekstan basshısı “Al Mirqab Capital” xoldingi basshısın qabılladı


Ózbekstan Respublikası Prezidenti Shavkat Mirziyoyev “Al Mirqab Capital” xolding kompaniyası atqarıwshı direktorı Saif ur-Rahmon Xondı qabılladı.
1983-jılda tiykar salınǵan “Al Mirqab Capital” xoldingi AQSH, Evropa hám Jaqın Shıǵısta “For Seasons”, “The Ritz Carlton” hám basqa brendlerdegi 20 iri miymanxana iyesi bolıp tabıladı. Kompaniya aktivleri bahası 8 milliard dollardan zıyattı quraydı.
Ushırasıwda miymanxana infrastrukturası hám turizm xızmetlerin rawajlandırıw, logistika hám energetika tarmaǵın modernizaciyalaw boyınsha sheriklik perspektivaları talqılandı.
Atap aytqanda, kompaniya tárepinen Tashkent wálayatında logistika orayı, Buxara qalasında miymanxana -kongress kompleksin qurıw, mámleketimizde elektr islep shıǵarıw quwatların keńeytiwge investiciya kirgiziw jobaları kórip shıǵıldı.
Investiciya joybarları qospa “jol kartası” tiykarında ámelge asırıladı.