Зиёвуддин Раҳим Дилдаги гаплар СЎзбоши

УЛАР СИЗГА ВАФОДОР ЭМАС 

---

Кўчада ўзини бозорга соладиган нозанинлар, зийнатга бурканган ҳурлиқолар уйдаги аёлингиздан 
чиройли кўриниб кетдими? Жуфти ҳалолингиз рўзғорбоп-у, анави бегона хотинлар кўнгилочарми? 
Шошманг, кўчадагилар аёлингизга ўхшаб ширин-шакар фарзандлар туғиб бера оладими, сизга 
меҳрибон ёр, вафодор рафиқа бўла оладими, молингизни, уй-жойингизни сақлай биладими, сизга 
ғамхўрлик қила оладими, оғир дамларда ҳамдард бўладими? Бу тарафини ҳам ўйланг. Нафсингизга ҳай 
беринг, ақлингизни ишлатиб, келажагингизни ўйлаб иш тутинг. 
УЙИДА ХОТИРЖАМЛИК ТОПИШ БАХТИ 
“Уйинг сени сиғдирсин” ҳадисида аҳли оиланг билан тинч-тотув яша, деган маъно кўзда 
тутилган. Зеро, инсон уйига сиғиши учун уйи жуда ҳашаматли бўлиши шарт эмас. Муҳими ота-онаси, 
аёли, фарзандлари билан муносабати яхши бўлса, хонадонида ҳузур-ҳаловат топса, бас. Агар кишининг 
оиласи нотинч бўлса, кенг уйга ҳам сиғмай қолади. Феълни кенг қилинса, тор кулба ҳам муҳташам 
саройдек туюлади. 
АЙБ КИМДА? 
Хотин экин экиладиган майдон, эр бўлса деҳқондир. Деҳқон нима экса, ўша нарса униб чиқади: 
арпа экса – арпа, буғдой экса – буғдой. Агар ерга арпа сочилса-ю, буғдой чиқмаса, айб ерда эмас, 
деҳқонда бўлади. 
СЕВГИ-МУҲАББАТ МОҲИЯТИ 
Севги бу кинома-кино, кўчама-кўча санқиш, хиёбонларда қўл ушлашиб юриш, овлоқ жойларда 
ёлғиз қолиш эмас, балки яхши кунларни ҳам, қийин дамларни ҳам бирга тотиш, бир-бирига ҳамдард 
бўлиш, битта мақсад йўлида бирлаша олиш, бир-бирини сўзсиз тушунишдир. 
Ёш ўтгани сари эҳтирослар бироз сўниб, ўрнини меҳрибонлик, бир-бирини қўмсаш ҳисси 
эгаллайди. 
Агар севги фақат чирой, бойлик, мансаб сабабидан бўлса, юзга ажин тушиши, мол-дунё қўлдан 
кетиши, мансабдан айрилиш билан “муҳаббат” ҳам тугайди. Ақлли инсон ҳаётини имон-эътиқод, одоб-
ахлоқ, ҳаё-ибо асосига қуради. Шунда икки дунё саодатига эришади.