Зиёвуддин Раҳим Дилдаги гаплар СЎзбоши

ОҒИЗ ЧУЧУК БЎЛИШИ УЧУН... 
“Ҳолва” деган билан оғиз чучук бўлмайди. “Қалбим тоза” деган билан жаннатга кириб бўлмайди. 
ҲАММОМДАН ЮВИНМАЙ ЧИҚҚАН ОДАМ 
Дунёга келиб, имон-эътиқодсиз, солиҳ амалларсиз яшаган шахс ҳаммомга кириб, ювинмай чиқиб 
кетган кимсага ўхшайди. Чунки ҳаммомга ювиниш учун кирилади. Дунёга охират тадоригини кўриш 
учун келинади. Охиратга тайёргарлик имон ва солиҳ амаллар билан бўлади. 
ЭГАСИДАН ҚЎРҚМАГАН КИМСА 
Эгасидан қўрқмаган бандадан қўрқмайди. Қалбида озгина бўлса ҳам Яратгандан қўрқиш ҳисси 
бўлмаган одам – гарчи дунёдаги энг оғир жазо турлари белгиланса ҳам – жиноятини давом 
эттираверади. 
ИСЁН ВА ШУКР 
“Эй Аллоҳ, нима гуноҳ қилувдим. Бошимда шунча мусибат, шунча ташвиш!” деб зорланишга 
шошилманг. Ундан кўра У Зот сизни тоғдай гуноҳларингиз учун қаттиқ жазоламаётганига шукр қилинг. 
АСЛИГА ҚАЙТИШ 
Динни уйдирма, деб биладиган, диндорларни масхара қиладиган кимсалар тилига ер 
қимирлаганида ёки кучли шамол бўлганида инсон қалбида эътиқод мавжудлигини исботлайдиган 
бирон калима келса, ажаб эмас. 
ЗИКР ВА ИСТИҒФОР ЗАРУРАТИ 
“Алҳамдулиллаҳ”, “Астағфируллоҳ” калималарини ҳар сонияда айтсак арзийди. Чунки У зот 
берган неъматларнинг саноғи йўқ. Қилаётган хатоларимиз эса ниҳоятда кўп. 

---

ИНСОН ОЖИЗЛИГИ 
Инсон нақадар ожиз. Ўз вақтида бутун бошли мамлакатни бошқарган шахс ҳам вақти келса, 
ўзининг қон босимига сўзи ўтмай вафот этиши мумкин. 
Минглаб одамлар қорнини тўйдирган саховатпеша инсоннинг вақти келса, томоғидан бир қултум 
ҳам сув ўтмай қолиши мумкин. 
Атомни кашф қилган одам кези келганда бир дона гугурт чўпи топа олмай, совуқда музлаб 
қолиши ҳам эҳтимолдан холи эмас. 
ДУНЁГА НЕГА КЕЛГАНМИЗ? 
Сув олиш учун дарё бўйига келдик. Баъзилар челагини тўлдириб сув олди. Баъзилар ярим челак 
сув билан, яна кимлардир қуруқ челак билан ортига қайтди.