Зиёвуддин Раҳим Дилдаги гаплар СЎзбоши

МАЪНАВИЙ ТАЯНЧГА ЭҲТИЁЖ 
Ҳаёт – қизиқ. Инсон ким бўлишидан қатъи назар ўзгалар меҳрига, руҳий далдасига муҳтож 
бўлади. Бир нарсани ўзи билса-да, уни бошқалардан эшитганида кўпроқ таъсирланади. Бу нима дегани, 
биласизми? Агар инсонлар бир-бирларини қўллаб-қувватлашса, бир-бирларига таянч бўлишса, турмуш 
обод бўлади, ҳаёт гўзал суратда ўтади. 
“БИЛСА – ҲАЗИЛ, БИЛМАСА – ЧИН” 
Бировларга “Билса – ҳазил, билмаса – чин” қабилида муомала қилиш айни иккиюзламачиликдир. 
БИР ДОНА ГУГУРТ ЧЎПИ 
Ўн тонна қуруқ ўтинни бир ерга тахлаганингиз билан иссиқлик тарқатмайди. Бунинг учун бир 
дона гугурт чўпи кифоя. Айрим инсонлар кўзга унча ташланмаса-да, ана шу гугурт чўпи вазифасини 
ўтайди: оммани яхшиликка йўллайди, қалбда сўниб қолган шижоат ўтини ёқади. 
МАЪНАН ЯҚИНЛИК ВА УЗОҚЛИК 
Шундай одамлар бор: уларга жисман яқинсиз, бироқ қалблар орасидаги масофа машриқ билан 
мағриб оралиғича келади. Яна шундай одамлар бор: улар сиздан минглаб масофа узоқда, лекин қалбан жуда 
яқин. 
ТИНЧ ОРОМ ОЛИШ УЧУН... 
Хотиржам ухлай олмаётганларга, ёмон туш кўриб, уйқуси бузилаётганларга беш вақт намоздан 
кейин, яна уйқуга ётишдан олдин “Оятул курсий”ни ўқиш тавсия этилади. Шунда ҳеч қандай уйқу дорига, 

---

тинч­лантирувчи воситаларга ҳожат қолмайди, инсон кўнгилдагидек дам олади. Бу, нақл билан собит 
бўлган, тажрибада ўз исботини топган. 
МАҚТОВ ВА ТАНҚИД 
Сизни ҳеч ким мақтамаса ёки ёмонламаса, демак, сиз ҳеч нарса қилмаётган экансиз. Одам бирон 
ишга қўл урса, кимгадир манфаат етказади, раҳмат эшитади. Табиийки, иши хатодан холи бўлмайди. 
Шунинг учун танқиддан ҳам қуруқ қолмайди. 
ЎРИНСИЗ ТАНҚИД – НОТЎҒРИ ТАШХИС 
Агар шифокор тўғри ташхис қўйса, бемор тезда оёққа туради. Ташхис хато бўлса, касалнинг 
тузалиши кечикиши ёки дард қайтага оғирлашиши мумкин. Ўринсиз ёки нотўғри танқид ҳам хато 
ташхисга ўхшайди. Бировни танқид қилиш кишидан маълум даражада илм, тажриба, фаҳм-фаросат 
талаб этади.