7-lektsiya Awıl xojalıq eginlerin egiw usılları. Almaslap egiw

I. Qatar arası islenbeytug’ın eginlerdi jalpılamay egiw.
1. Jalpılamay qatarlap egiw.
2. Tar qatarlap egiw.
3. Shaxmat usılında egiw.
4. Lenta usılında egiw.
5. Qarıq ultanına egiw.


II. Qatar arası islenetug’ın eginlerdi ken’ qatarlap egiw.
1. Kvadrat uyalap egiw.
2. Ken’ qatarlap egiw.
Jalpılamay qatarlap egiw. Bul usıl menen arpa, biyday, sulı ha’m basqa eginler egiledi, qatar arası 13-15 sm ha’m o’simlikler arası 1-1,5 sm boladı.
Tar qatarlap egiw. Arpa, biyday, jon’ıshqa ha’m basqa eginler egiledi. Qatarlar arası 6-8 sm, o’simlikler arası 3-4 sm boladı.
Shaxmat usılında egiw. Bul masaqlı da’n, jon’ıshqanı egiwde qollanıladı. Shaxmat usılında egiw ushın seyalka bir gektarg’a jumsalatug’ın tuxım mug’darının’ yarımı sarplanatug’ınday etip sazlanadı. Sol mug’dardag’ı tuxım bir bag’ıtta egiledi, qalg’an yarımı ekinshi bag’ıt boyınsha da’slepkisine keselep egiledi. Shaxmat usılında egilgen eginler qatarlap egilgenge qarag’anda ıg’allıqtan, jaqtılıqtan ha’m azıq eelemntlerinen jaqsı paydalanadı.
Lenta usılında egiw. Bunda eki yamasa bir neshe qatar bir birine jaqın egiledi. Qatarlar arası 7-8, 12-15 sm boladı, keyingi qos qatarlar arası 45-60 sm boladı. Geshir, pıyaz ha’m basqa eginler usı usılda egiledi.
Qarıq ultanına egiw. İssı ha’m qurg’aq, taw aldı rayonlarında biydaydı qarıq jarıp onın’ ultanına egedi. Bizin’ jag’dayımızda g’awasha atızları kelesi jılı biyday egiw ushın ajratılg’an bolsa o’sip turg’an g’awasha atızı avgust-sentyabr ayında suwg’arıladı. Jer tapqa kelgennen keyin kultivaciya islenip topıraq jumsartıladı. Keyin arnawlı seyalka menen gu’zlik biyday egiledi. Sol jılı kesh gu’zde yamasa ba’ha’rde paxal atızdan jıynap alınadı. Gu’zlik biyday ta’rbiyası dawam etedi.
Ken’ qatarlap etiw. G’awasha, ma’kke, ju’weri, la’blebi, ayg’abag’ar sıyaqlı eginler ken’ qatarlap egiledi ha’m egiste STX-4A ha’m STVX-4 markalı seyalkalardan paydalanıladı.
Qatarlar ha’m qatardag’ı o’simlik aralıg’ı ha’r bir eginnin’ biologiyalıq o’zgesheliklerine qaray belgilenedi. G’awasha qatar arası 60 ha’m 90 sm ken’likte egiledi.