Alohida ta’lim ehtiyoji bo‘lgan bolalar uchun

Jamoada mehnat faoliyati (1soat) 
Inson hayotning turli jabhalarida mehnat qiladi. O‘qiydi, kasb-hunar
o‘rganadi. Bozorda, jamoat joylarida, korxona tashkilotlarda faoliyat olib
boradi. Insonlar orasida yurish, ular bilan ishlash, muloqot qilish insondan
katta mas’uliyat talab qiladi. Buning uchun insonda muomala madaniyati,
o‘zgalarni hurmat qilish, o‘z ishida mas’uliyatli bo‘lish kabi fazilatlar
jamlangan bo‘lishi kerak. 
Jamoa bilan ishlaganda sizni bilim, malaka, tajribalaringiz va asosiysi
axloqingiz namoyon bo‘ladi. Misol uchun maktab hovlisida hashar
qilinmoqda. Kimdir yer chopgan, kimdir o‘tlarni yulgan. Shunda siz hech
qanday ish qilmay o‘tiradigan bo‘lsangiz do‘stlaringiz ko‘ziga yomon
ko‘rinasiz. Ular siz haqingizda salbiy fikrlarni aytadilar. 

---

41 
Jamoa bo‘lib ishlaganda o‘zaro ishonch va hurmat, aniq muloqot va
o‘z ishiga mas’uliyat bilan yondoshish talab etiladi. Jamoa bilan ishlaganda
maqsad va fikrlar bir yo‘nalishga qaratiladi. Barcha o‘z vazifasi burchini
to‘liq ado etishi kerak. Aytaylik qishloqdagi bir do‘kon sotuvchisi
haridorlarga qo‘pol muomala qildi. Haridorlar bunday badfe’l, qo‘pol muomala 
qiladigan sotuvchilarning do‘konidan hech narsa harid qilishni xohlamaydilar.
Natijada do‘konga keladigan haridorlar kamayib ketadi. Oqibatda do‘kon
egasi va uning jamoasi moddiy tomondan zarar ko‘radi. Jamoa bilan
ishlaganda doimo e’tiborli, mas’uliyatli bo‘lish talab etiladi. 
• Maslahat zardan qimmat. 
• Ko‘mak bo‘lsa har ishda, bitadi qolmay qishga. 
 

---

42 
Birlashgan o‘zar 
Muzaffar yoshligidan o‘qituvchi bo‘lishni orzu qilardi. Buning uchun
ilmli bo‘lish kerakligini yaxshi bilardi. U o‘zining bor vaqtini, mehrini ilmga
bag‘ishladi.Til o‘rgandi, o‘qishga kirdi. O‘qishda o‘qib yurgan paytlarida til
markazlarida bolalarga ingliz tilidan dars o‘tib yurdi. Shu vaqtlarda uning
qalbiga, men ham til markazi ochsam. Qishloqdagi bolalarga turli tillarni
o‘rgatsam degan orzu o‘tardi. Bu orzusini amalga oshishida uni yonida ahil 
jamoa bo‘lishi kerakligini yaxshi bilardi.
O‘tgan yili o‘qishni bitirib tuman markazida til o‘rgatadigan markaz
ochdi. Atrofiga ilmli, fidoyi bo‘lgan yoshlardan iborat jamoani shakllantirdi.
Jamoa a’zolariga shirin so‘z, mehribon va o‘z vaqtida talabchanlik bilan
muomala qildi. Jamoa a’zolari tartibli, samimiy bir-biriga mehribon edi. Tez
orada bu markaz tumanda mashhur bo‘lib ketdi. Hatto qo‘shni tumanlardan
ham bolalar kelib til o‘rganadigan bo‘ldi. Jamoaning bunday tez fursatda
mashhur bo‘lishiga sabab, jamoadagi yaxshi muhit, ahillik, inoqlik
maqsadlarining birligi edi. Bugun bu markazda bolalarga ingliz, rus, arab
tillari o‘rgatilmoqda. Jamoaning maqsadlari katta. Kelajakda boshqa
tumanlarda ham shunday til markazlarini ochish.