«Bayanlar toplamı» mbs ha’m u’zliksiz oqıw bag’darlamasındag’ı oqıwshılardın’ baylanıslı so’ylewin o’siriwge tiyisli talaplardan kelip shıqqan halda du’zildi. Toplamdag’ı tekstler tematikalıq ta’repten ra’n’be-ra’n’

BERILGEN REJE TIYKARINDA TAN’LAP BAYAN JAZIW USHIN TEKSTLER


Sarı sabaq
1. Karima keste tigip otırg’an edi. Dostı Nasiba kelip qaldı. Onın’ kelgeninen Karima su’ysinip ketti. 2. Nasibanın’ sarı sabag’ı tamam bolg’an edi. Karimadan azg’ana sarı sabaq soradı. Ol da tamam bolg’anlıg’ın ayttı. 3. Usı waqıtta Karimanın’ artında jatqan pıshıq qıymıldap qaldı. Ol bilmesten qutıshag’a tiyip, onı domalatıp jiberdi. Qutısha ashılıp ketti. Onnan sarı, qızıl sabaqlar shashılıp ketti. 4. Nasiba jalt etip Karimag’a qaradı. Karima qılg’an isinen uyaldı. Ol shashılıp jatqan sabaqlardı jıynastırıp qutıshag’a saldı.
(Bayan ushın gu’rrin’nin’ ekinshi bo’liminen paydalanıladı) (70 so’z. 45-55 so’z de bolıwı mu’mkin)
Imla: waqıt, bilmesten, shashılıp, jalt etip, uyaldı so’zlerinin’ imlası u’stinde islenedi.
Analiz: (Klass jazıw taxtasına aldınnan jazıp qoyılg’an tekst ashıladı ha’m oqıtıladı) Ne ushın Karima su’ysindi? Nasiba Karimadan ne soradı? Karima ne dedi? Ne ushın Nasiba Karimag’a qaradı? Karima qanday awhalg’a tu’sti?
Oqıtıwshı oqıwshılarg’a gu’rrin’nin’ en’ qızıqlı bo’limin bayan qılıwı kerekligin aytadı ha’m anıqlaw ushın soraw beredi? Karimanın’ sırı qaysı bo’limde ashıladı?
Juwap alıng’annan son’, oqıtıwshı gu’rrin’di Karimanın’ sırı ashılıwı haqqında jazıw kerekligin tu’sindiredi ha’m sol jerin oqıydı.
Oqılg’an to’rtinshi u’zindi qayta aytıp beriledi.
Klass jazıw taxtasına aldınnan jazıp qoyılg’an reje ashıladı. Oqıwshılardın’ rejenin’ birinshi bo’limine bergen juwapları analiz qılınadı ha’m jazıladı. Jumıs usınday ta’rizde dawam etedi.
Reje:
1. Nasibanın’ sarı sabag’ı tamam boldı.
2. Qutısha ashılıp ketti.
3. Karima uyaldı.


A’ke sawg’ası
Munira erte oyandı. Ol bet-qolın juwıp bag’qa kirdi. Bag’da Minajatdin ag’a tereklerin ta’rbiyalap atır edi. Munira a’kesinen bir tu’p ashıq ren’li roza gu’l na’lin beriwin iltimas qıldı.
A’kesi Muniradan na’llerin ne qılıwın soradı.
Munira mektepte na’l egiw aylıg’ı baslang’anın ayttı. Ol ko’p jıllıq gu’llerden egip, mektep ha’wlisinin’ gu’lzar bolıwına ja’rdem bermekshi eken.
Minajatdin ag’a quwandı. Qızına tu’rli gu’l na’llerinen sawg’a qıldı. Munira na’llerdi alıp, su’ysinip mektepke ketti. (68 so’z. 50-60 so’z de bolıwı mu’mkin)