Ибрайым юсупов өмир, саған ашықпан…

ПАЗНАЛАР 
 
Алмастайын қыл қаўасыз егелмей,
Мисли қатарласып ушқан ғаз барар.
«Жер астында ай баратыр» дегендей,
Ҳармаңлар, жапакеш полат пазналар! 
Ҳəр салған табыңыз - бир шуўмақ қосық,
Болмас бир сөзиңди алып я қосып
Сизди ысқан шадлы мийнеттиң йошы,
Өшпес из қалдырған дана пазналар. 
Тракторлар оятып кең даланы,
Жаўқылдатып сизди иске салады.
Қуслар кейниңизде тойлап барады,
Бəҳəр нурын жерге берген пазналар. 
Дийқан иси толы алғыс, мəниге,
Өмир беретуғын ырысқы дəнине,
Гүмис гилтсиз кең байлықтың кəнине,
Азат мийнет жалтыратқан пазналар. 
Пуўы шығып жаңа жабылған нандай,
Жас топырақтың таныс хош ийиси қандай!
Жер бетинде толқын дөреп атқандай,
Шымларды төңкерген палўан пазналар. 

---

130 
Жаңа үмит пенен жанын сүйинип,
Ҳарам шөплер түп-тамырдан қыйылып.
Изиңизден ығбал дəни қуйылып,
Жер анамыз жүкли болар, пазналар. 
Шым топырақ қурсын жазып дем алар,
Жер баўырына сиңип сөнбес нур қалар.
Ертеңгиниң ырысқы дəни ырғалар,
Сизлер жүрип өткен жерден, пазналар. 
Инсан мийнетиниң рəҳəтин көрсин,
Ҳəмме жерде ығбал урығы өнсин.
Жер баўырын тилсе тек плуглар тилсин,
Қуралды еритип, қуйсын пазналар. 
 
1992-ж. 
МЕН АБАЙДЫ ЯДҒА БИЛГЕН ХАЛЫҚПАН 
(28-май 1971-жыл, Алма-Атада Абайдың 125 жыллық 
мерекесинде оқылған қосық) 
Мен Абайды ядға билген халықпан...
Əмиў бойы туўып өскен топырағым,
Сизиң менен бир путақлас жапырағым.
Кеўлим ашық - ақшамы жоқ жарық таң, - 
Мен Абайды ядға билген халықпан. 
Шыңғыс таўда шыққан Абай жырлары,
Көп жаңғыртқан қарақалпақ қырларын,
Бердағымның қосығына қосылып,
Қулағыма бирге шерткен сырларын. 
Көш артында асық ойнап жасымда,
Тарийхтан сəл кешеўиллеп қалыпбан,
Билим бар деп ескермепбен басында, -
Өлең сөзге өзим бирақ алықпан, -
Мен Абайды ядқа билген халықтап. 
Бирге бастық тарийх жолын ақырын,
Қанша узақ жолы болса түйениң. 
«Қарақалпақлар - даланың бас ақыны» 
Деп айтқан ғой уллы Шоқан жийеним. 
Бахыт излеп бир қатепке жүк басып, 
Бабалардың аты шаршап-шалыққан.
Домбыраңа дуўтарым тур жупласып,
Жырласқанда жырыңа дым қанықпан,
Мен Абайды ядға билген халықпан. 
Мине бүгин бахыт ели далаң тур,

---

131 
Кең даланы кеңелдирген адам тур.
Жериң жақын «жəннет» деген уғымға,
Абай аға аңсап кеткен заман бул. 
Дилмашсыз ақ қазақшаға қанықпан.
Күй тыңлайық, домбыраңды ала бар. 
Сен Абайдың бирер сөзин умытсаң,
Мен айтайын, кел де меннен сорап ал. 
Тегимиз бир ерис-арқаў шалысқан.
Мийрим сүтин бир емишектен емискен,
Тар қурсақта тай ғунандай тебискен,
Ханаласым қазақ ели, шарықлаң!
Мен Абайды аға тутқан халықпан. 
28-май, 1971-жыл. Алма-Ата.