Jalil rahmat

30.12.2007.

Bolalikdagi sevgi

Kech kuz. Kun juda salqin.
Jondorda yomg`ir jala,
Ko`k gumbazida chaqin,
Yashnagan bog`u dala.

Qo`shni hovlida o`lan,

Yor-yor avjida, biroq
Oqshom tushishi bilan,
O`chdi elektr chiroq.

Yor vaslin bir ko`rmakka,

Chiqdim ko`cha boshina,
Botibdi loy, ko`lmakka,
Kelin tushgan moshina.

Qo`shni hovliga bu kech,

O`tar bo`ldim tom osha,
Tomda turib to`yni, hech
Qilganmisiz tomosha?.

Bir pas pastga tushgim yo`q,

Sinfdoshlar safiga,
Quruq gapga xushim yo`q,
She’r yozsam bir sahifa.

Jo`ymo`minlik jo`ralar,

Bu ishimga hangu mang,
Eh, pishmagan g`o`ralar,
Tatimas to`y, anjuman.

Egnida harir libos,

Men suygan qiz bu o`sha,
Uzib berganman gilos,
Tanasi qo`sha-qo`sha.

Suvga chiqqanda subhda,

Kiyardi u xonatlas,
Juft-juft olmani suvga,
Oqizganmiz basma-bas.

Chopqillab keng dalada,

O`ynaganmiz kim o`zar,
Bugun yomg`ir jalada,
Kelin bo`ldi u go`zal.

Bolalikdagi sevgi,

Qirda qolgan qizg`aldoq,
Yuvsa ketmas bir belgi –
Ko`ksimda u qizdan dog`.
* * *
Ona mehri tubsiz bir ummon,
Har qatrasi tiriklik jomi.
Kundek kulib boqaylik har on,
Tushmay turib umrning shomi.

* * *
Ona bag`ri keng osmon nuri beqiyos,

Ona mehri bir ummon duri beqiyos.
Nur qadri, dur qadrini angladim, faqat
Onam umri ufqiga botganda quyosh.

* * *
Jahonda onalar jami g`animat,

Tortar taomining ta’mi g`animat.
Bolam deb tilidan bol tomar chog`i,
Koyib dil og`ritar dami g`animat.

* * *
Hech bir banda bo`lomas hech kun,

Ko`hna dunyo qasriga ustun.
Yetay desang, tirigida yet,
Ota-ona qadriga do`stim.

* * *
Ona ko`ngli misli bir ka’ba,

Otaga tik boqma, qil tavba.
Ul zotlarning muborak nomi,
Umring kitobida sarlavha.

* * *
Keksa dilga qursang imorat,

Hajlarga ne hojat ziyorat.
Ona ko`ngli og`risa, Alloh
Oxirating qilmasmi g`orat.

* * *
Ilohiy ishq sharobini yut,

Har bir kunning savobini tut.
Xudo xoxlab, ulg`aysa farzand,
O`sha savob javobini kut.

* * *
Dunyo ishi o`zi antiqa,

Sig`may qolar so`zi mantiqqa.
Kim to`shakka tosh qotgan yuz yil,
Kim jonini topshirgan tikka.

* * *
Charxi falak aylanar asta,

Ko`nglimiz bir cheti shikasta.
Biz kutmagan nogoh fursatda,
Taqdir toldan tutqazar hassa.

* * *
Ota-ona etdilar qazo,

Qaysi rizo, qaysi norizo?
Norizolik ro`zi mahsharda,
Sizu bizga eng oliy jazo.

* * *
Umrim bo’yi tirikdaysiz,

Dardimga teng sherikdaysiz,
Onajon, har lahza, har dam
Yuragimda, she’rimda siz.

* * *
Ruhingiz qoshida egib turib bosh,

Qarog’imda qalqir qatra-qatra yosh,
Ko’ksimdagi ohlar alangasida,
Erib ketar go’yo, butun qabr tosh.

O`lim kelsa aytib kelmas

I
Yaproq uzib har daraxtdan,
Ko`ksimda bir bog` yaratgan,
Mehr sochib, nur taratgan,
Otam endi qaytib kelmas,
O`lim kelsa aytib kelmas.

Yerga qadab ketmonini,

Yanchib bug`doy somonini,
Qurib qo`yib qo`rg`onini,
Otam endi qaytib kelmas,
O`lim kelsa aytib kelmas.

Kun oqshomga og`averar,

Oy ham ma’yus boqaverar,
Anhor sokin oqaverar,
Otam endi qaytib kelmas,
O`lim kelsa aytib kelmas.

Sabo, ko`nglim so`roqlab kel,

Dil daftarim varaqlab yel,
Boychechak sen daraklab kel,
Otam endi qaytib kelmas,
O`lim kelsa aytib kelmas.

Qariyverib qadrin bildim,

Farzand farzin, qarzin bildim,
Bu haq so`zni har zum bildim,
Otam endi qaytib kelmas,
O`lim kelsa aytib kelmas.


II
Har tong ra’nochoy damlagan,
Kulcha yopib non tanlagan,
Jambilu rayhon jamlagan,
Onam endi qaytib kelmas,
O`lim kelsa aytib kelmas.

Uzib qo`yib bir bosh uzum,

Eshikka ko`z tikkan har zum,
Duolari uzun-uzun,
Onam endi qaytib kelmas,
O`lim kelsa aytib kelmas.

Tugunida behi, anor

Tashib, o`tgan kuni bisyor,
Yalpiz tutar yana bahor,
Faqat, onam qaytib kelmas,
O`lim kelsa aytib kelmas.

Goh gapimdan og`ringan u,

Og`rib turib sog`ingan u,
Bugun ketgan bog`imdan u,
Onam endi qaytib kelmas,
O`lim kelsa aytib kelmas.

Vujud qarib, ruh toliqqan,

Ko`ngil mehrga zoriqqan,
Jonim titrar bu og`riqdan,
Onam endi qaytib kelmas,
O`lim kelsa aytib kelmas.