Joybar teması: Fermer xojalıqları iskerligin modellestiriw

Joybardıń maqseti: Fermer xojalıqları iskerligin basqarıwdıń informatsiyalıq hám matematikalıq modellerin jaratıw.
Úyrenilgen máseleler:
- Fermer xojalıqlarınıń informatsiyalıq sistemasın jaratıwǵa baylanıslı qoyılatuǵın talaplar, korporativ informatsiyalıq sistemanı rawajlandırıw máseleleri.
- Fermer xojalıqlarınıń iskerligin CASE texnologiyalar járdeminde modellestiriw.
- Fermer xojalıqlarınıń iskerligin sıpatlı analizlewde matematikalıq modellestiriw hám sanlı sheshimlerdi alıw.
İzertlew usılları hám quralları. Berilgen máselelerdi sheshiwde, úyreniwde CASE texnologiyalar, matematikalıq modellestiriw usılları, eki kriteriyalı optimallastırıw usılları, stoxastikalıq programmalastırıw usılları qollanıldı.
Berilgen pitkeriw qánigelik jumısınıń nátiyjeleri, fermer xojalıqlarınıń iskerligin optimallastırıwǵa baylanıslı qaralǵan teoriyalıq hám ámeliy kórsetpeler – jeke fermerler, xakimiyat, region kóleminde talqılanıwı hám ele de jetilistiriliwi múmkin, sonday-aq informatsiyalıq texnologiyalar tarawı boyınsha arnawlı qánigeler, studentler hám analitikler tárepinen ámeliy hám teoriyalıq jaqtan paydalanılıwı múmkin.
Joybar dúzilisi. Joybar tiykarınan kirisiw bóliminen, tiykarǵı bólimnen, juwmaqlaw bóliminen hám paydalanılǵan ádebiyatlar diziminen, qosımshalardan turadı.
Kirisiw bóliminde jumıstıń qısqasha mazmunı, maqseti hám qoyılǵan máselelerdi orınlaw etaplarına qısqasha toqtalıp ótiledi.
Jumıstıń tiykarǵı bólimi tórt paragraftan ibarat. Jumıstıń 1-paragrafında fermer xojalıqları informatsiyalıq sistemasınıń rawajlanıwı, maqset hám wazıypaları máselesine toqtaladı. Jumıstıń 2-paragrafı fermer xojalıqları biznes protsesslerin CASE texnologiyaları tiykarında informatsiyalıq modellestiriw máselelerine arnalǵan bolıp tiykarınan fermer xojalıqların basqarıw boyınsha funktsionallıq model BPWIN programmalıq-instrumentallıq quralı arqalı izertlenedi. Jumıstıń 3-paragrafında fermer xojalıqları iskerligin ekonomiko-matematikalıq analizlew maqsetinde máseleni optimallastırıwdıń eki kriteriyalı matematikalıq modeli usınılǵan. Al jumıstıń 4-paragrafında fermer xojalıqların effektiv basqarıwdıń eki kriteriyalı stoxastikalıq máselesi sheshimi keltiriledi.