M. Dáwletov, Sh. Allaniyazova, D. Seytqasımov, A. Dáwletova

122-shınıǵıw. Qosıqtı tásirli etip oqıń hám mazmunın sóylep 
beriń.
ANA HAQQÍNDA ÁPSANA
(ańız)
Bunnan kóp jıl burın meniń bir babam,
Bar dúnyasın jol qárejet qılıptı.
Iyman tilew ushın Kábatulladan,
Segbir tartıp jolǵa shıǵıptı.
Urılar tonaptı sońǵı tillasın,
Táwir kiyimlerin olay-pulayın.
Sonda, ol kól qılıp, kóziniń jasın,
Áptada bolıptı, kún ótken sayın.
Jıǵılıptı bir kúni, ol ashlıqtan,
Kún uzaq jatıptı, dińke-dimarsız.
Shıdap júrgen eken, janı qaslıqtan,
Dúzde qalmayın, — dep jat elde jalǵız.
Ińirde kelipti, onıń qasına,
Bir miyrim-shápáátli áptada fellax,
Hám alıp ketipti, óz kúlbesine,
Diywalı qırq tesik, kótere sańlaq.
Awzına tutıptı, tapqan taǵamın,
Hám sebep bolıptı, ol shıqpas janǵa‚
Erteńine sorap jaǵdayın-halın,
Bir soraw beripti sonda babama.

---

94
«Ana bar ma, depti áy jora, sende?»,
«Awa‚ ǵárip anam bar» — depti babam.‚
«Onda neǵıp júrseń o, áttegene»,
Ol artıq ǵoy, biziń Kábatulladan.
Búytkenshe álpeshlep tuwǵan anańdı,
Onı ırza qılsań perzentlik sıydan,
Quday abat qılıp eki dúnyańdı,
Saǵan berer edi, tawsılmas iyman.
Waq, depti biyshara babam qıynalıp,‚
Kózinen jas emes‚ qan tógip sonda,
Kóp jıl malay bolıp, uzaq ǵamlanıp,
Bir kúni shıǵıptı, ańsaǵan jolǵa.
Arzıw-armanlıqta jetisip elge,
Kózlerine súrtip ana topıraqtı,
Paqır kúlbesine kirip kelgende,
«Ǵárip anam aman ba?» – dep soraptı.
Juwapsız qalıptı, bul sorawları,
Dúnyadan ótipti ǵárip anası,
Ele de jaqsı eken xalıq qatarı,
Aman eken hayal, bala-shaǵası.
Tek qalıptı, sol ármanlı babamnan,
«Kábań — anań» — degen jaqsı násiyat.
Shınında, mıń, million Kábatulladan,
Anańnıń bir kúlip baqqanı zıyat!
(T. Seytjanov)