M. Dáwletov, Sh. Allaniyazova, D. Seytqasımov, A. Dáwletova

§ 21. Ananıń kewli balada
120-shınıǵıw. Tekstti oqıń. Mazmunın aytıp beriń.
Ana kirpik bolsa, perzent kóz bolar,
Perzent — kepter, ana — zer gúmbez bolar,
«Analıq haqını tolıq ótedim», —
Degen gáp kenewsiz qurǵaq sóz bolar.
Ana — dúnyadaǵı eń áziz, eń mehriban insan. Ol per-
zentti dúnyaǵa keltiredi, háyyiw aytıp álpeshlep ósiredi. Aq 
súti menen tárbiyalap, kámalǵa keltiredi. Ana — shańaraq-
tıń uytqısı. Shańaraǵınıń tatıwlıǵı ushın, perzentleri ushın 
barlıq kúsh-jigerin jumsaydı. «Jánnet analardıń ayaǵınıń 
astında» degen hikmetli sózdiń tórkininde ananıń miyneti, 
ananıń pidayılıǵı túsiniledi. Sonlıqtan, xalqımız: «Ana 
bir qolı menen besik terbetse, bir qolı menen dúnyanı 
terbetedi», — dep biykarǵa aytpaǵan. Demek, analar haqqında 
qansha jaqsı sóz aytsaq ta — az.
Ana — muqaddes! Biz Watandı da Ana Watan dep 
ullı anaǵa megzetemiz. Ananı húrmet etiw, oǵan xızmet 
etiw — perzentlik parızımız. Demek, Watandı súyiw, oǵan 
xızmet etiw de hárbirimizdiń minnetli wazıypamız. Tariyxta 
atı qalǵan Tumaris, Gúlayım, Qumar analıq sıyaqlı 
analarımızdıń mártligi, batırlıǵı, sabır-taqatlılıǵı jaslarımızǵa 
úlgi bolıp qaladı. Biziń elimizde hayal-qızlarǵa degen 
húrmet-izzet júdá joqarı. «Biz hayal mısalında bárinen burın 
jaratqannıń ullı káramatı bolǵan muqaddes ana obrazın 
kóremiz hám bárshemizdi dúnyaǵa keltirgen, aq sút berip 
ósirgen bul insannıń aldında bir ómir qarızdarlıq sezimi 
menen jasaymız», — degen edi Jurtbasshımız óz sózinde.
121-shınıǵıw. Naqıl-maqallardıń mánisin túsindiriń.
Ananıń kewli balada,
Balanıń kewli dalada.
Ana menen bala,
Gúl menen lala.

---

93
Altın-gúmistiń gónesi bolmas,
Ata-ananıń bahası bolmas.
Aq sút bergen ananıń,
Balada haqı kóp bolar.
(Qaraqalpaq naqıl-maqalları)