M. Dáwletov, Sh. Allaniyazova, D. Seytqasımov, A. Dáwletova

§ 22. Sport Watandı dúnyaǵa tanıtadı
126-shınıǵıw. Tekstti oqıp shıǵıń. Mazmunın sóylep beriń.
SPORT — SALAMATLÍQ GIREWI
Ózbekstan Respublikasında sport tarawına mámleket 
siyasatı dárejesinde itibar berilmekte. Biz bilemiz, sport 
mámlekettiń dańqın kóteretuǵın, dúnyaǵa tez tanıtatuǵın 
tarawlardıń biri. Sporttıń jaslardı saw-salamat, aqıllı hám 
kúshli etip tárbiyalawdaǵı áhmiyeti úlken. 

---

97
Elimizde balalar hám jaslar sportın rawajlandırıwǵa 
úlken itibar berilgen. Buǵan mámleketimizde ótkerilip atır-
ǵan úsh basqıshlı sport jarısları, oqıwshılar arasındaǵı 
«Úmit nálsheleri», akademiyalıq licey ham kásip-óner kolledj 
oqıwshıları arasındaǵı «Bárkamal áwlad», joqarı oqıw orınları 
arasındaǵı «Universiada» jarısları mısal bola aladı.
Ózbekstan sportshıları dúnya júzilik sport jarıslarına, 
olimpiadalarǵa qatnasıp, shaxmat, boks, gúres hám t.b. sport 
túrleri boyınsha ózlerin dúnyaǵa tanıtpaqta. Respublikamızda, 
barlıq rayonlarda, mekteplerde sport zalları, maydanshaları 
salınıp, jaslarımızdıń sport penen shuǵıllanıwına keń múm-
kinshilikler jaratılmaqta.
127-shınıǵıw. Qosıqtı oqıp shıǵıń. Yadlap alıń.
ÓZBEKSTAN PALWANLARÍNA
Túrkler áwladınıń batır ulları,
Xalqımnıń maqtanısh asqar shıńları,
Álemdi aldı qálb otıńnıń nurları,
Xalqıńız beline belbew bolǵansız.
Pahlavan Maxmuddur palwanlar piri,
Ámir Temur ismi máńgige tiri,
Túrkstan atalǵan watannıń gúli,
Sizler sol babadan miyras qalǵansız.
Babalardıń qanı tamırında qaynap,
Qolıńda jelbirep muqaddes bayraq,
Abduǵabbar boldı xalqıńa sawlat,
Búginginiń Alpamısı bolǵansız.
Tańlandırıp Erkinbay jáhánniń xalqın,
Dúnyaǵa tanıttı xalqımnıń atın,
Zeyinliler biler mártliktiń parqın,
Watanıńnıń maqtanıshı bolǵansız.
Xalıq baxıtlı batır ulları menen,
Aqıllı, ádepli qızları menen,
6 — Qaraqalpaq tili, 8-kl

---

98
Qırǵa dus kelmesin baxıtlı kemeń,
Ana jurtımızǵa qorǵan bolǵansız.
Sizler tayanıshı ana xalqımnıń,
Ózbekstan atlı ullı jurtımnıń,
Onıń kelbetin siz aydın, húr qılıń,
Sebep sizler onnan ómir alǵansız.
(N.Tóreshova).
Sorawlar:
1. Xalqımızdıń márt, bahadır perzentlerinen kimlerdi bi-
lesiz?
2. Erkinbay Qutıbaev qaysı sport túri menen jáhánge 
tanılǵan?
3. Sizler ózlerińiz qaysı sport túri menen shuǵıllanasız?
4. Dúnya júzine belgili qaysı sportshılardı bilesiz?
5. «Sport — meniń ómirimde» temasında kishi tekst 
jazıń.
6. Qosıqtı yadlap alıń.