P. Berdanova, P. Abdalieva, Sh. Oteniyazova Didaktika

Oqıtıw metodların tańlaw. Pedagogika páninde oqıtıwshılardıń ámeliy tájiriybesin úyreniw hám ulıwmalastırıw tiykarında oqıtıw metodların tańlawǵa oqıw-tárbiya procesinde bolıp atırǵan sharayatlar hám anıq jaǵdaylarǵa baylanıslı belgili jantasıwlar payda boladı. Oqıtıw metodların tańlawda tómendegi jaǵdaylar inabatqa alınıwı lazım:
Zamanagóy didaktikanıń jetekshi ideyaları, tálim, tárbiya hám rawajlandırıwdıń ulıwmalıq maqsetleri;
Úyrenilip atırǵan pán mazmunı hám metodları, temalardıń ózine tán
ózgeshelikleri;
Jeke pánler metodikasınıń ózine tán hám ulıwmadidaktikalıq metodların tańlap alıwǵa qoyılatuǵın talaplardıń óz ara baylanıslılıǵı;
Belgili sabaq materialınıń maqseti, wazıypaları hám mazmunı; Anaw yamasa mınaw temanı úyreniwge ajıratılǵan waqıt;
Oqıwshılardıń jas ózgeshelikleri, biliw imkaniyatları, dárejesi; Oqıwshılardıń sabaqqa tayarlıq kóriw dárejesi;
Oqıw orınları, auditoriyalardıń materiyallıq támiyinlengenlik dárejesi, zatlar, kórsetpeli qurallar, texnikalıq qurallardıń barlıǵı;
Oqıtıwshınıń imkaniyatları, teoriyalıq hám ámeliy tárepten kásiplik tayarlıq dárejesi, pedagogikalıq sheberligi, jeke sıpatları;
oqıw orınlarında pánler aralıq birge islesiwdiń ornatılǵanlıǵı.
Oqıtıwshı bul jaǵdaylardı esapqa alıp, anaw yamasa mınaw izbe-izlikte awızeki, kórgizbeli yaki ámeliy metodlardı, reproduktiv yaki óz betinshe jumıslardı basqarıw metodların tekseriw hám óz-ózin tekseriw metodların tańlaw barısında anıq sheshimler qabıl etedi.
Qadaǵalawshı sorawlar:

1. 
   Oqıtıw metodı degenimiz ne?
   
2. 
   Oqıtıw qurallarına neler kiredi?
   
3. 
   Oqıtıw procesinde sáwbetlesiw metodın qollawda nelerge itibar qaratıw zárúr?
   
4. 
   Awızeki bayan etiw metodlarınıń abzallıqları nede kórinedi?
   
5. 
   Kórgizbeli metodlardıń qanday túrleri bar?
   
6. 
   Ámeliy metodlar mazmunı neden ibarat?
   
7. 
   Didaktikalıq oyınlar qanday maqsette qollanıladı?