Teoriyaliq materiallar 1-tema. Finanslıq analiz pániniń teoriyalıq tiykarları

1.3.Finanslıq analiz pániniń metodı hám onıń ózine tán ózgeshelikleri
Metod júdá keń mánis hám túsinikke iye. Pánniń metodı obyektti úyreniw usılları, quralları, jolların xarakterleydi. Metod grekshe «metod» sózinen alınǵan hám «úyreniw jolı, usılı» degen mánisti ańlatadı.

Metod degende reallıqta júz berip atırǵan waqıya hám processlerdi úyreniwge jantasıw usılı túsiniledi. Analiz hám sintez ulıwma dialektikalıq úyreniwdiń ilimiy usılı sıpatında qaraladı. Onıń ózine tán ózgesheligi sonda, bul usıl óz-ara baylanısta úyreniwdi xarakterleydi.

Analiz pániniń (onıń mikro kólemdegi barlıq túrlerine qatnasta) metodın anıqlaw da onıń predmetin belgilewdegi sıyaqlı júdá tartısıwlı máselege aylanǵan hám bul boyınsha házirge shekem bir pútin pikirge kelinbegen.

Finanslıq analiz metodı degende finanslıq-xojalıq iskerlikti analitikalıq izertlewdiń usılları hám tártipleri túsiniledi.

Analiz metodın shártli túrde eki toparǵa ajıratıw múmkin: ulıwma hám jeke metodlarǵa.

Ulıwma metod – barlıq analiz túrleri hám hár túrli pánler sheńberinde qollanılatuǵın, pán obyektlerin úyreniwde bir túrde paydalanatuǵın usıllar hám tártipler sisteması bolıp tabıladı.

Jeke metod – tek usı pánniń ózine tiyisli bolǵan, izertlew obyektine qarap tańlanatuǵın usıllar hám tártipler sisteması bolıp tabıladı.

Finanslıq analizdi ótkeriw, álbette onıń tártibin anıqlap alıwdı talap etedi. Bul tártiplerdi tómendegi basqıshlarda klassifikaciyalaw múmkin.