Zbek tilida nutqiy odat birliklarining lisoniy xususiyatlari

2. Nutqning soʻzlovchi va tinglovchi ijtimoiy mavqeiga koʻra ixtisoslashuvi. Bu jarayonda nutqning asimmetrik koʻrinishi yuzaga keladi. Ijtimoiy mavqei yuqori shaxs nutqida oʻziga bino qoʻyish, mensimaslik ottenkalari, ijtimoiy mavqei quyi boʻlgan kommunikant nutqida tobelik ottenkalari sezilishi mumkin:
Ikki mirshab mingboshini yechintirmoqqa boshladi. Mingboshi hali ham boyagi kulishida davom etardi:

• 
  Obbo betavfiq-ey. Namozshomda uxlaganini! Mehmonxonadan koʻzlarini uqalay-uqalay Miryoqub chiqib keldi. U, hali ayvondan tushmay turib:
  
• 
  Hormang, xoʻjayin! — deb qichqirdi. Mingboshi yana oʻsha kulish bilan oʻtirgan joyida unga tomon evrildi:
  
• 
  Ha, xudo bexabar! Nima bu bemahal uyqu? Namozshom paytida-ya!
  
• 
  Ha, xoʻjayin, shunaqa... Sizni kutib oʻtirib, uxlab qolibman.
  
• 
  Qachon kelib eding?
  
• 
  Kech peshinda. Shundan beri yoʻlingizga koʻz tutib oʻtiribman.
  
• 
  Qani oʻtirganing? Uyquni uribsan-ku! Qani, nima gaplar bor? Yangi gaplardan gapir.
  
• 
  Yangi gapni sizdan eshitamiz. Shaharda edingiz. Kimlarni koʻrdingiz?
  
• 
  Kimni koʻrardim? Noyib toʻrani koʻrdim.
  
• 
  Nima gap ekan?
  
• 
  Nima gap boʻlardi. Beriroq kel!
  

Mingboshining bu amri bilan unga tomon borayotgan Miryoqub mirshablarga ishorat qildi, ular uzoqlashdilar. (Choʻlpon “Kecha va kunduz”)
3. Nutqning soʻzlovchi va tinglovchining jinsiga koʻra ixtisoslashuvi. Sotsioling-vistikada nutq kommunikantlarning millati, jinsi, yoshi, ijtimoiy belgilariga qarab ixtisoslashadi.
Muloqot oʻziga xos qonun-qoidalarga, ya’ni me`yorlarga ega va biz bir holatdan ikkinchi holatga oʻtar ekanmiz, onglimi-ongsizmi shu holat uchun me`yor boʻlgan muloqot normalariga boʻysunamiz, oʻzimizni har daf`a yangi boʻlgan holatimizga moslashtiramiz, oʻzgarib turamiz. Nutqiy vaziyatga moslashamiz. Bu muloqot shakli, mazmuni va vositalarini tanlashda nafaqat kommunikantlarning saviyasi, balki ularning jinsi qanaqaligi, ya’ni ayol yoki erkak jinsiga mansubligi ham ahami-yatlidir.
Muloqotning jinsiy xoslanishi ham ta’sir birliklari orasida muhim ahamiyat kasb etadi. Erkak va ayol biologik va fiziologik tomondangina emas, balki muloqot xulqi (muomala tarzi, usuli) jihatidan ham farqlanadi, albatta. Masalan, oʻzbek xotin-qizlari nutqiga xos aylanay, girgitton, oʻrgilay, qoqndiq kabi soʻzlar ijobiy ma’no nozikligini ifodalovchi leksik vosita sanaladi. Ular koʻproq keksa ayollar tomonidan qoʻllanadi. Xotin-qizlar nutqining individual xususiyatini voy undovining qoʻllanilishi asosida ham oydinlashtirish mumkin. Ma’lum boʻlishicha, voy undovi oʻndan ortiq ma’no nozikligini ifodalaydi. Bularga sevinish, erkalash, achinish, qoʻrqish, havas, sarosimalanish, koyish, alam singari holatlar kiradi. Oʻzbek erkak va ayollar nutqining leksik, frazeologik jihatdan xoslanishi, ayniqsa, qargʻish hamda soʻkishlarda yanada yaqqolroq namoyon boʻladi. Biroq bu dolzarb mavzu ayrim kuzatishlarni hisobga olmaganda uzoq vaqt tadqiqotchilar nazaridan chetda qolib keldi.
4. Muloqot xulqining yoshga koʻra xoslanishi. Nutqning kommunikantlarning yoshiga koʻra farqlanishi ham oʻziga xos lisoniy ifodalarda aks etadi, umrning turli davridagi kishilar nutqi orasida tafovut katta. Masalan, 18-25 yoshdagi kishilar bilan 30-50 va undan katta yoshdagi kishilarning nutqi anchagina farqlanadi. 18-25 yoshdagi kishilar nutqida jargon, argo, vulgarizm, olinma soʻzlar tez-tez qoʻllanilishining guvohi boʻlamiz.
Soʻzlashuv nutqidagi dialogic diskursda muayyan tasvir maqsadi bilan oʻzga tilga oid soʻz va iboralar qoʻllanishi kuzatiladi. Tilning lugʻat tarkibiga kiritilmagan, faqatgina ogʻzaki nutqda mavjud boʻlgan bunday chet soʻzlaridan badiiy nutqda kommunikant xarakteri, sotsial mansubligi va ichki dunyosi tasvirida, voqea-hodisa-ning xorijga xosligini ta’kidlash maqsadida foydalaniladi. Shuningdek, ular matnga voqealar boʻlib oʻtayotgan oʻringa ishora qilish yoki nutqiy vaziyat va unda ishtirok etayotganlarning sotsial mansubligi haqida ma’lumot berish istagi bilan ham kiritilishi mumkin.
Muloqotda yosh xususiyatlatni hisobga olish milliy xarakter bilan chambarchas bogʻliq. Oʻzbek muloqot xulqiga koʻra rahbar yoshi katta xodimlarga topshiriq berayotganda iltimos, maslahat uslubida ish tutishi tavsiya etiladi. Shuningdek, ommaviy muloqotlarda, “yoshullilarimiz yaxshi bilishadi...”, “oqsoqollarning takliflarini hisobga olib... “, “tajribali xodimlanmizning yoʻlidan borib...” yoki “toʻgʻrimi falonchi aka?!”, “falonchi akamiz ma’qul koʻrsa...”, “ustozlarimiz qarshi boʻlishmasa....” kabi iboralar bir tomondan rahbarning, ikkinchi tomondan butun jamoaning yoshi katta xodimlarga hurmatini ifodalasa, shu bilan birga ular rahbarni qoʻllashiga zamin yaratadi. Bu holat adresantning mavqeyini yanada mustahkamlay-di.
Shu oʻrinda nutqiy muloqot haqida ham ayrim fikrlarni berib oʻtish lozim. Muloqot shaxslararo munosabatning shunday koʻrinishiki, uning yordamida odamlar bir-birlari bilan oʻzaro ruhiy aloqaga kirishadilar, oʻzaro axborot almashadilar, bir-birlariga ta’sir oʻtkazadilar, bir-birlarini his qiladilar, bir-birlarini tushunadilar. Shuning uchun muloqot ijtimoiy-psixologik hodisa sifatida ijtimoiy turmushning barcha sohalarida ishtirok etib, hamkorlik faoliyatining moddiy, ma’naviy, madaniy, emotsional, motivatsion qirralarining ehtiyoji sifatida vujudga keladi. Keyingi yillarda tilshunoslikda nutqiy muloqot tushunchasi koʻp qoʻllanmoqda. Tilning voqelanishda inson omili bilan bogʻliq ravishdagi nutqiy muloqot jarayonini tadqiq qilish lingvopragmatik va psixolingvistik yoʻnalishning oʻrganish manbasini tashkil etadi. Ma’lumki, nutqiy muloqot oʻnlab – milliy, etnografik, ijtimoiy, falsafiy-ma-daniy, axloqiy-estetik, tarixiy, maishiy va ruhiy omillarning lisoniy birliklar voqelanishi bilan qorishuvidan iborat dinamik sistemadir. Demak, insonning mental faoliyati bilan bogʻliq ravishdagi hodisalarni tadqiq qiluvchi kulturologiya fanining muhim tarmoqlaridan biri sifatidagi pragmatik tilshunoslik inson subyekti va obyektivlik(lison)ni qorishiq yaxlitlik sifatida tadqiq qiladi. Zero, nutqda subyektivlik va obyektivlikni bir-biridan ajratgan holda tadqiq qilish mumkin emas, sistemaviylik yaxlitlik xossasi bilan xarakterlanadi. Demak, nutqiy faoliyat unga yondosh va insonga xos ruhiy, fiziologik, ijtimoiy, ma’naviy, madaniy sistemalar bilan bogʻliqlikda tadqiq etilgandagina nutqiy muloqotning mohiyati ochiladi va individual hodisa sifatidagi nutqqa obyektiv baho beriladi.
Oʻzbek xalqi uchun yosh va jins belgilari nutqiy odatda muhim oʻrin tutadi. Shuni nazarda tutib muloqotchilarni yoshi va jinsi nuqtayi nazaridan guruhlarga boʻlamiz.
Keksa yoshdagi kishilar nutqi ancha konservativ xususiyatga ega boʻladi. Keksalar jamiyat tomonidan qabul qilingan me’yorlarga ancha koʻnikkan boʻlib, ular bu an’ananing koʻproq ijobiy jihatlarini e’tiborga oladilar. Yoshlar tomonidan qilinayotgan yangiliklar ularni qiziqtirmasligi, hatto ularda norozilik tugʻdirishi mumkin. Shuningdek, keksa adresantlar maslahat berishga moyil boʻladilar.
Keksa yoshli komunikantlar nutqiga xos fonetik belgilar tovushlarning salmoqli, vazmin ohangda yumshoq aytilishi bilan xarakterlanadi. Misol tariqasida “salomla-shish” vaziyatini koʻrsatuvchi quyidagi gapda bu yaqqol seziladi:
“Vaalaykum assalom, umringdan baraka top, bolam”, - dedi u (Oqsoqol) vazmin ohangda. (Oʻ. Hoshimov)
Leksik jihatdan kuzatilganda, keksa yoshdagi kishilar nutqida koʻpincha “balli”, “barakalla”, “yashang”, “qulluq” singari qator soʻzlar nutqiy odatlarning turli vaziyatlarida ishlatilishini uchratamiz. Ularda hayotdan shukronalik, murosasozlik munosbati ancha ustun boʻlgani bois nutqlarida shuning natijasi sifatida “alhamdulillo”, “ xudoga shukur”, “astagʻfirullo”, “tovba” kabi ishlatadigan soʻzlar koʻproq quloqqa chalinadi.
Keksa yoshdagi kishilarning oʻz tengdoshlariga munosabatlari birmuncha oʻziga xos tarzda boʻladi. Ular nutqlarida “birodar”, “doʻstim’,”oʻrtoq’, “oshna” kabi forma-larni qadrdon tengdoshlariga qarata ishlatiladi. Bunday muomala oddiy xalq boʻlgan keksalarning norasmiy munosabatlarida tez- tez koʻzga tashlanadi:
“Hazilniyam bilmaysanmi, nima balo, Duma?! Ma’lim Noʻgʻayqoʻrgʻonda maktab ochmoqchi. Katta maktab. Ishonganimdan senga olib keldim-da, oʻrtoq!”
( Oʻ. Hoshimov)
Keksa yoshdagi koʻpchilik erkaklar oʻz turmush oʻrtoqlariga muomalada ancha keskin, dagʻal boʻladilar:
“ Oqsoqol patnis tashib yurgan Xolposh ovsinimga tegishadi:
– Hoy semiz, koʻzingga qara! Yiqilib-netib yurma tagʻin. Seni koʻtarib yurishning oʻzi boʻladimi?!” (Oʻ. Hoshimov)
Yoshlar nutqi keksalar nutqidan koʻp jihatdan farq qiladi. Bu, albatta, ularning xarakteri, xatti-harakatlari bilan aloqadordir.
Yoshlar oʻzlarini kattalar dunyosiga va aytish mumkinki, raqib yoshlar guruhiga , koʻpincha, qarama-qarshi qoʻyadilar. Jamiyatdagi qiyinchiliklar, kamchiliklarga reaksiya sifatidagi munosabatlar ular nutqida yaqqol yuzaga chiqadi. Yoshlardagi kurashish ishtiyoqi , uslub va shakllar konkurensiyasi hayotning yangi uslubi hamda nutqning yangi koʻrinishlari paydo boʻlishiga sabab boʻladi³⁴.
Yoshlar kekslardan farq qilib, nutq faoliyatida, koʻpincha, ortiqcha koʻringan til birliklarini ishlatmaydilar. Soʻzlarni shartli buzish, boshqa tillardan soʻzlarni oʻziga xos tarzda oʻzlashtirish, ba’zan sun’iy koʻringan til birliklarini ishlatish, soʻzlarni qandaydir yangi usulda, oʻzgartirib nutqqa olib kirishga intilish yosh adresantlar nutqiga tegishli asosiy xususiyatlar sanaladi. Ba’zan erish, notabiiy koʻringan bu usullar adabiy tilga yangi formulalar, maxsus verbal va noverbal vositalar olib kirishiga ham asos boʻlib xizmat qiladi. Badiiy asarlarda ham buni koʻrish mumkin :
“Mal-lades, Mufti! – deya Chinnibek uni quchib, qoq boshining yargʻogʻidan oʻpib oldi. – Yaltir kal, no golova!” (E.A’zamov)
Yoshlar oʻrtasida bir-biriga laqab bilan murojaat qilish ustunroq, ba’zan bu holat keksalarda ham kuzatiladi:
“Oqsoqol bobomga yuzlandi:
– Duma!.. Gapirsang-chi mundoq! (Oʻ.Hoshimov)”