Ўзбекистон республикаси олий ва ўрта махсус таълим вазирлиги низомий номли тошкент давлат педагогика университети

ЎЗБЕКИСТОН РЕСПУБЛИКАСИ
ОЛИЙ ВА ЎРТА МАХСУС ТАЪЛИМ ВАЗИРЛИГИ
НИЗОМИЙ НОМЛИ
ТОШКЕНТ ДАВЛАТ ПЕДАГОГИКА УНИВЕРСИТЕТИ
О.А.Каримова

Жиноят ҳуқуқи

фанидан ўқув қўлланма


ТОШКЕНТ – 2009

А Н Н О Т А Ц И Я

Жиноят ҳуқуқи фани Педагогик университетлар қошидаги “Миллий ғоя ва маънавит асослари, ҳуқуқий таълим” йўналиши бўйича талабаларга ҳуқуқ фанлари тизимининг бир соҳаси эканлигини, фаннинг мақсад ва вазифаси, жиноят тушунчаси, жиноятнинг олдини олиш, инсонлар ҳавфсизлигини жиноий тажоввузлардан қўриқлаш, фуқароларни қонунга риоя қилиш руҳида тарбиялаш, жиноят турлари ва уларга қўлланиладиган жазо чораларини белгилаш каби муҳим масалаларни ўргатади. .

Жиноят ҳуқуқи икки қисмдан ташкил топган. Биринчи, умумий қисмда, бир неча бўлимлар берилган, унда жиноят ҳуқуқига тааллуқли умумий тушунчалар берилган. Иккиничи қисми, Махсус қисм деб аталади, унда жиноят турлари ва уларга қўлланиладиган жазо чоралари кўрсатилган. Ўқув қўлланмада шу соҳа олимлари М.Рустамбоев, Б.Ахроров ва бошқаларнинг дарсликларидан фойдаланиб, педагог-ўқитувчиларнинг дастурларини инобатга олган холда ёздик.
Ушбу ўқув қўлланма «Миллий ғоя ва маънавит асослари, ҳуқуқий таълим» йўналишида таълим олувчи талабаларга жиноят ҳуқуқи фанини ўрганишда кўмаклашади ва келгуси педагогик фаолиятида шу фанга боғлиқ мавзуларни ёритишда ёрдам беради, деган умиддамиз.
Муаллиф : профессор О. А. Каримова.
Тақризчилар: ю.ф.н. доц. А.Тўхтахунов.
катта ўқитувчи: Ф. Алимов.
катта ўкитувчи: Г. Исроилова.


Ўқув қўлланма Низомий номидаги Тошкент Давлат педагогика университетининг Илмий кенгашида кўриб чиқилган ва тавсия қилинган.

@Низомий номидаги Тошкент давлат педагогика университети
КИРИШ

Ўзбекистон мустақилликка эришиб, дунё харитасидан ўрин эгаллади. Бу давр ичида Ўзбекистонда ҳуқуқий давлатни барпо этиш ва фуқаролик жамиятини шакллантириш йўлида дадил қадамлар қўйилди. Ўзбекистонда мустақилликни мустаҳкамлаш, давлат ва жамиятни демократлаштириш ҳамда эркинлаштириш борасида эришилган улкан муваффақиятларни дунёдаги энг ривожланган давлатлар ҳам эътироф этмоқда. Мустақиллик ёшларнинг ҳуқуқий савдхонлиги ва ҳуқуқий тарбиясига алоҳида эътибор қаратиб, уларга қонун доирасида иш тутишга ўргатмоқда. Жиноят ҳуқуқи фани эса бу жараёнда муҳим аҳамият касб этади.

«Жиноят ҳуқуқи» фанининг асосий вазифаси: жиноят ҳуқуқи фанининг принциплари, категориялари ва қоидалари тўғрисидаги назарий билимларини талабаларга ўргатишдан иборатдир. Уларда жиноят ва жазо тушунчаси, жиноий жазо турлари, уларнинг мақсад, вазифаси, айрим жиноятларнинг вужудга келиш сабабларини кўрсатиш, вояга етмаганларнинг жиноят қилиш сабабларини аниқлаш, уларга ҳуқуқий тарбия беришда кўмаклашиш, амалдаги жиноят қонунларидан тўғри фойдаланиш каби билимларни беришдан иборатдир.
“Ҳуқуқшунослик” фанида Жиноят ҳуқуқига тўрт соат дарс ажратилган. Ушбу ўқув қўлланмадан ўқитувчи дарс ўтиш жараёнида жиноят тушунчаси, айниқса, вояга етмаганлар жинояти бўйича керакли маълумотлар олиши мумкин.
«Жиноят ҳуқуқи» фанидан ёзилган ушбу ўқув қўлланма «Миллий ғоя ва маънавит асослари, ҳуқуқий таълим» йўналишида таълим олувчиларга мўлжалланган.