Ózbekstan respublikasí joqarí HÁm orta arnawl

III BAP DENE TÁRBIYANÍŃ SHÓLKEMLESTIRIWDIŃ SABAQ FORMASÍ
Oqıw tárbiya jumısları boyınsha sabaqtı pedagogikalıq uqıp, kónlikpe hám bilim menen qurallanǵan muǵallim yamasa trener shólkemlestiredi. Ol jámiyet hám mámleket aldında oqıw tárbiya jumısınıń nátiyjelilgi tuwralı juwap beredi. Muǵallim hám oqıwshılar arasındaǵı óz-ara baylanıs dene tárbiya jumısı ushın eń qolaylı jaǵdaydı payda etedi. Sabaq aldın ala dúzilgen keste boyınsha ótkeriledi. Shınıqtırıw sabaqları sport klubınıń jobasına tiykarlanıp dúzilgen keste boyınsha shólkemlestiriledi. Sabaqqa xarakterli nárse - bul oqıwshılar quramınıń turaqlı bolıwı hám oqıw toparı jaslarınıń birgelikte bolıwı. Oqıwshılardıń úziliksiz iskerligi bir dizimge biriktiredi hám dene tárbiya jumısında tárbiyalıq hám bilim beriw wazıypalardı sheshiwge járdemin tiygizedi.
Dene shınıǵıw sabaqları ulıwma pedagogikalıq hám metodikalıq principlerge tiykarlanıp dúziledi. Olar sabaqta qollanatuǵın tómendegi talaplar menen tolıqtırıladı.
1. Sabaq hár tárepleme tásir jasawı tiyisli bilim beriwge, tárbiyalıq hám den sawlıqtı bekkemlewge.
2. Úyretiw hám tárbiyalaw sabaqtıń basınan aqırına shekem iske asırılıwı tiyis.
3. Sabaqtıń mazmunı hám paydalanatuǵın metodlar ózgerip onıń wazıypası quramalastırılıp shuǵıllanıwshılardıń denesinde dinamikalıq ózgeris payda etiwi kerek.
4. Barlıq oqıwshılardıń iskerlgi jedellestirilip olardı jeke ózgeshelikleri esapqa alınıwı tiyis.
5. Sabaqtıń ulıwma hám jeke wazıypaları durıs anıqlanıwı talap etiledi mısalı: kúshti, tezlikti, shıdamlılıqtı, shaqqanlıqtı tárbiyalaw.

3.1. Sabaqtıń wazıypasın anıqlaw

Dene tárbiya sabaǵı metodikalıq jaqtan sapalı ótiw ushın qoyılatuǵın talaplardıń biri-bul onıń wazıypasın anıq qısqasha etip qáliplestiriw bolıp esaplanadı. Bul ushın shereklik hám bir jıllıq wazıypalardı jaqsı biliw kerek boladı. Sabaq wazıypasınıń izbe-izligi saqlanıp júdá anıq hám sabaq waqtında qalıwsız iske asırılıwı kerek.
Sabaq waqtında bilim beriw tárbiyalıq hám den sawlıqtı bekkemlew wazıypaları sheshiledi. Hár sabaqqa qoyılatuǵın wazıypanıń sanı baǵdarlama boyınsha berilgen, ol oqıwshılardıń berilgen shınıǵıwlardı úlgeriw múmkinshiligine hám oqıw tárbiya jumısınıń maqsetine baylanıslı boladı. Hár bir sabaqta 3 wazıypaǵa shekem sheshiliwi múmkin, álbette birinshi ret sabaqtıń ótiliwine dıqqat kóbirek bolıwı tiyis.
Sabaqtıń wazıypasın anıqlaǵanda úyretiwdiń izbe-izligi, háreket sapasın tárbiyalaw, uqıp hám kónligiwdi qáliplestiriw, den sawlıqtı bekkemlew, kollektivlikti tárbiyalaw, tártipti qáliplestiriw hám t.b. esapqa alınadı mısalı: jańa shınıǵıwdı túsindiriw bólip úyretiw. ótilgendi qaytalaw, úyretilgendi jetilistiriw, belgili sapanı tárbiyalaw, tekserip kóriw hám t.b. Joqarı klasslarda wazıypa úyrenilgen shınıǵıwlardıń texnikasın jetilistiriwge baǵdarlanadı. Jańa materialdı úyretiw ushın wazıypa bir tema boyınsha belgileniwi múmkin.