«Ызбекистон Республикаси иив давлат ён\ин хавфсизлиги хизматининг Хизмат Низомини тасди=лаш ты\рисида»

Ўзбекистон Республикаси ИИВнинг 2010 йил «_30__» июндаги _81_–сонли буйруғига и л о в а

ЎЗБЕКИСТОН РЕСПУБЛИКАСИ ЁНҒИН ХАВФСИЗЛИГИ ХИЗМАТИ ФАОЛИЯТИНИ ТАШКИЛ ЭТИШ ТАРТИБИ ТУҒРИСИДА


Н И З О М


I-БОБ. УМУМИЙ ҚОИДАЛАР

1. Мазкур Низом Ўзбекистон Республикасининг Ёнғин хавфсизлиги тўғрисидаги қонуни талаблари асосида ишлаб чиқилган бўлиб, Давлат Ёнғин хавфсизлиги хизмати гарнизонлари ва қисмлари фаолиятини ташкил этиш тартибини белгилайди.

2. Низом талаблари Ички ишлар вазирлиги Давлат Ёнғин хавфсизлиги хизматининг (келгуси матнда - ДЁХХ) бошқарув органлари ва қуйи тизимлари, ёнғин-техник, илмий-тадқиқот муассасалари, таълим муассасалари шахсий таркиби учун мажбурийдир.
ДЁХХнинг бошқарув органлари ва қуйи тизим шахсий таркиби, бўлинмаларда хизматни ташкил этиш ва олиб боришнинг алоҳида хусусиятларини эътиборга олган ҳолда ишлаб чиқилган ва белгиланган тартибда тасдиқланган бошқа меъёрий ҳужжатлар талабларига ҳам амал қилишлари шарт.
3. Идоравий ва кўнгилли Ёнғин хавфсизлиги хизмати бўлинмалари шахсий таркиби мазкур Низом талабларига Ўзбекистон Республикасининг қонунлари ҳамда ушбу бўлинмаларда хизматни ташкил этишнинг алоҳида хусусиятларини назарда тутувчи идоравий меъёрий ҳужжатлар талабларидан келиб чиққан ҳолда амал қиладилар.
4. Ёнғин хавфсизлиги хизматининг ёнғинларни бартараф этиш бўйича асосий ҳаракатлари «Ёнғин хавфсизлиги хизмати бўлинмалари томонидан ёнғинларнинг ўчирилишини ташкил этиш тартиби тўғрисидаги Низом» ҳамда Ёнғин хавфсизлиги хизматлари фаолиятини белгиловчи бошқа меъёрий ҳужжатлар билан тартибга солинади.
5. Ёнғин хавфсизлиги хизмати кучлари ва воситаларининг ёнғинлар профилактикаси ҳамда ёнғинларни ўчириш билан боғлиқ бўлмаган ишларни бажаришга жалб қилинишига, агар қонун ҳужжатларида бошқа қоида назарда тутилмаган бўлса, йўл қўйилмайди.
6. Мазкур Низомда қуйидаги тушунчалардан фойдаланилади:
ёнғин ўчириш хизмати (келгуси матнда - ЁЎХ) – Ёнғин хавфсизлиги хизмати (ЁХХ)нинг ёнғинларни бартараф этиш билан боғлиқ биринчи даражадаги авария-қутқарув ишларини бажаришга доимий шайлигини таъминлашга қаратилган фаолият тури бўлиб, гарнизон ва навбатчилик хизмати шаклида ташкил этилади.