1. Oqıw materialları

Ápiwayı belgi dep predikatlar logikası tilinde logikalıq terminlerge (yaġnıy, bir biykarlaw belgisinen hám logikalıq kvantordan basqa) iye emes belgige, al quramalı belgi dep joqarıdaġı talapqa juwap bermeytuġın belgige aytıladı. Mısalı, ápiwayı belgi retinde qandayda bir mámlekettiń paytaxtı bolıw belgisin, Ózbekstannıń paytaxtı bolıw belgisin; quramalı belginiń mısalı retinde «eki hám úshke bóliniwdi» alıp qarasaq boladı.
Al maqul hám teris belgilerge tek ġana ápiwayı belgiler bólinedi. Maqul belgide belgiler biykarlaw formasına iye emes túrinde beriledi, al teris belgilerde belgiler biykarlaw túrine iye boladı.
Solay etip, túsinik bir tekles predmetlerdiń kópliginiń eń áhmiyetli belgilerin ulıwmalastırıw nátiyjesinde payda bolıp, reallıqtı (haqıyqatlıqtı) ilimiy biliwdiń eń tiykarġı formalarınıń birin beredi. Ol tiykarınan birinshiden ulıwmalıqqa iye ayrıqsha belgilerdi sáwlelendiriwshi bilimlerdiń kóriniw forması, ekinshiden informaciyanı jetkerip beriwshi usıl wazıypaların atqaradı.


9-tema. Oylawdıń tiykarǵı formaları
1.Túsinik oylawdıń forması
2.Túsinikler menen ámelge asırılıtuġın logikalıq operaciyalar
3.Pikir oylawdıń forması sipatında
4. oy juwmaǵı hám onıń túrleri
Tayanısh túsinikler:
til, belgi, predikat, túsinik, pikir, oy juwmaġı, belgi indeks, belgi obraz, belgi simvol, analiz, sintez, salıstırıw, ulıwmalastırıw, túsiniktiń mazmunı hám kólemi, jıynaqlawshı hám jıynaqlawshı emes (bólistiriwshi) túsinikler, abstrakt hám konkret túsinikler, qatnaslı hám qatnassız túsinikler, maqul hám teris túsinikler
Túsiniklerdiń payda bolıwınıń logikalıq usılları
Túsiniklerdi payda etiw ushın predmettiń eń áhmiyetli qásiyetlerin bólip kórsetiwimiz shárt. Onıń ushın predmetlerdi bir biri menen salıstırıw nátiyjesinde, olarġa tán ulıwma belgini ajıratıwımız tiyis. Buġan salıstırıw, analiz, sintez, abstrakciyalaw, ulıwmalastırıw sıyaqlı logikalıq usıllardı qollanıwdıń járdeminde erisemiz.