1. Oqıw materialları

Filosofiyanıń jámiyettegi áhmiyeti hám roli yaki ámeliy filosofiya. Ádette filosofiya kúndelik turmıs hám ámeliyattan bir qansha jıraq bolġan hádden tısqarı ulıwmalıq máselelerdi úyrenedi degen pikir orın alġan. Biraq bul pikirge qosılıw múshkil, óytkeni ulıwmalıq teoriyalar, eger olarġa keńirek mániste hám uzagıraq perspektiva kóz-qarasınan jantasılsa, bazıda bilimniń tar tarawlarına tiyisli bolġan kópġana belgili bir ideyalardan jaqsıraq nátiyje beredi.
Álbette, filosofiya udayı kúndelik turmıstan málim dárejede jıraq bolġan hám sonday bolıp qalmaqta. Onıń ózine tán ózgesheligi, biytákirarlıġı áyne usı faktorda kórinis tabadı. Biraq, basqa tárepten, filosofiya ápiwayı sociallıq bolmıs, kúndelik sociallıq, siyasiy yaki ekonomikalıq turmıs ámeliyatı dep ataw múmkin bolġan nárselerden de ózin alıp qashpaydı. Filosofiyalıq refleksiya hám onıń menen ajıralmas bolġan háreketlerdin bul baġdarı XX ásirde hátteki pútkil bir baġdar – ámeliy filosofiyanıń júzege keliwine sebep boldı. Bunda filosofiya siyasiy, sociallıq hám basqa sheshimler qabıl qılıwġa sózsiz tárizde hám tikkeley tásir kórsetedi, dep aytiw múmkin emes, biraq bul halattı pútkilley biykarlaw da orınlı bolmaydı. Biraq sol nárse anıq, filosofiya adamlardıń dún`yaġa kóz-qarasın qáliplestiriw arqalı olardıń minez-qulqın, joqarıda zikir etilgen sheshimlerdi qabıllaw procesinde olardıń jantasıwların da kóp aspekttenn belgileydi, filosoflardıń ózleri bolsa bazıda adamlar turmısın pútkilley ózgertiwshi áhmiyetli ideyalar baslaması menen shıġadı.
Filosoflar jámiyettegi mánawiyat hám ádep-ikramlılıqtın halatı ushın da sezilerli dárejede juwapker, óytkeni tek sociallıq ólshemler hám principlerdi rawajlandırıp, olardan sabaq berip yaki kitaplar, maqalalar arqalı sociallıq sananı olar menen ashna etip ġana qoymastan, al bálkim basım kópshilik jaġdaylarda keń jámiyetshilik pikirin oyatatuńın, sociallıq áhmiyetke iye bolġan, sociallıq-siyasiy mashqalalar, mádeniyat hám mánawiyat máselelerine baylanıslı talqılawlar hám diskussiyalar shólkemlestiredi.