«Bayanlar toplamı» mbs ha’m u’zliksiz oqıw bag’darlamasındag’ı oqıwshılardın’ baylanıslı so’ylewin o’siriwge tiyisli talaplardan kelip shıqqan halda du’zildi. Toplamdag’ı tekstler tematikalıq ta’repten ra’n’be-ra’n’

Sabaqtın’ maqseti: Reje du’ziwge u’yretiw. Gu’rrin’de su’wretlewdin’ ornın baqlaw.
Sabaqtın’ barısı.
I. Oqıtıwshı tekstti oqıp beredi ha’m sorawlar ja’rdeminde analiz o’tkeredi: «Nazir keliwi menen qanday waqıya ju’z berdi? Qalayınsha in tayar boldı? Indi ne qıldı? Ne ushın in jasawg’a qarar qıldı? Ne ushın qus sayrap jiberdi? Siz gu’rrin’nin’ qaysı bo’limin en’ a’hmiyetli dep esaplaysız?»
II. Gu’rrin’ rejesi du’ziledi. Oqıwshılar analiz dawamında berilgen sorawlarg’a ha’r qıylı juwap beriwi mu’mkin. Oqıtıwshı oqıwshılarg’a o’zleri a’hmiyetli esaplag’an bo’limge tema qoyıwdı usınıs etedi. Oqıwshılar qoyg’an temalar jazıw taxtasına jazıladı. Temalar oqıladı, biraq dodalanbaydı.
III. Oqıtıwshı tekstti eki ma’rte oqıydı. Oqıwshılar rejeni aqırına shekem jetkeredi. Bul jumıs ja’ma’a’t tu’rinde o’tkeriliwi mu’mkin. Oqıwshılar ta’repinen a’hmiyetli esaplang’an temalar jazıw taxtasınan oqıladı, ja’ne qanday bo’limler bar ekenligi anıqlanadı ha’m reje du’ziledi.
Oqıwshılardın’ erkinligin arttırıwda olardın’ ha’r birine tolıq reje du’ziwdi tapsırıw, du’zilgen rejeni dodalaw ha’m birden-bir reje du’ziw ju’da’ a’hmiyetli.
Rejenin’ u’lgi ko’rinisi:
1. In sog’ıwg’a qarar qıldı.
2. In pitti.
3. Ha’kim ha’m Nazir.
4. Aradan 3-4 ku’n o’tti.
5. Minnetdarshılıq.
IV. Reje u’stinde islewde jan’a maqset qoyıladı. Bunın’ ushın to’mendegi sa’wbet sho’lkemlestiriledi:
«Innin’ tayar bolıwı haqqında gu’rrin’de ne delinedi? Ne ushın in jasawg’a qarar qılındı? Nege Nazir qustı Ha’kimge ko’rsetti? Qustın’ ayag’ı qanday edi?»
Waqıya turmısta qanday ju’z bergen bolsa, solay jazıw kerek. Bunda qaysı waqıyanı birinshi jazamız? Da’slep qustın’ qalayınsha Nazirdin’ qolına tu’skenin jazamız. Keyin ne? Nazirdin’ ne sebepten qustı Ha’kimge ko’rsetkenin jazamız.
Endi du’zilgen rejemizdi ko’rin’. Gu’rrin’di siz aytqanday jazıw ushın rejemiz sa’ykes pe? Reje siz aytqanday jazıwdı talap qıla ma? Aldın’g’ı rejemiz bunday aytıp beriwimiz ushın sa’ykes emes eken. Usı du’zilgen rejege ja’ne qanday o’zgertiwler kirgiziw kerekligin oylap ko’rin’.
V. O’z betinshe jumıs.
Oqıwshılar reje qatarlarına o’zgertiwler kirgizedi ha’m olardı izbe-izligin saqlag’an halda ko’shiredi.
VI. Reje tiykarında tekst tolıq aytıp beriledi. Usı protsesste (aytıp beriw waqtında) tekst mazmunının’ baylanısı ushın bazı bir metodikalıq o’zgertiwler kirgiziw za’ru’r boladı. Ma’selen: Nazir keliwi menen ha’mme quslar ushıp ketti. Bir jaradar qus usha almay qaldı. Sonnan son’ rejenin’ ekinshi qatarına o’tiledi.
Oqıwshılardı bayan jazıwg’a jeterli da’rejede tayarlaw ushın tekstti eki ma’rte qayta aytıp beriw lazım.
Solay etip, o’zgertilgen reje tiykarındag’ı bayan oqıwshılardın’ belsendiligin arttıradı, olar reje du’ziw ha’m usı tiykarda aytıp beriwde do’retiwshilik o’zgeshelikke iye bolg’an bo’limlerdi kirgiziwge a’detlenedi.