Ибрайым юсупов өмир, саған ашықпан…

ҚЫРҒАЎЫЛ 
 
Киятыр едим шар бузып,
Үстинен таза қардың мен.
Түскендей қолдан ғарбызым, 
Аңырайып қалдым мен. 
О, сулыўлық! О, дала!
Сүўретшисең-аў əжайып!
Қарай бердим қадала, 
Жутынып, мойным узайып. 
Бир шоқ урық астында,
Ғыжлап жанып шоқ жатыр.
Умыт қалған далада
Акварельдей боп жатыр... 
Иреңниң ағла, тынығы,

---

63 
Барынша көркке толғандай. 
Айқулақтың сынығы
Аспаннан түсип қалғандай. 
Ғыжымы мойын тығылып, 
Бас жатыр жан саўғалап,
Сатқын қуйрық қубылып,
Сыртта жатыр «мында» лап. 
Ийкемсиз жас мүшеси
Тар кийимге сыймаған 
Сулыў қыздың денеси 
Сыяқланды ол маған. 
Ашығыңдай аймалап,
Баўырыңа бассаң дə!
Деп турғанда сығалап,
Ушты дүрлеп аспанға. 
Үркип кетти басымнан
Даланың жуўас ойлары.
Жүрегим туўлап жалма-жан,
Жуўырғызбай қоймады. 
Атлы, жаяў анталап,
Арсылдап ийтлер шабысты. 
Аңшының көзи қанталап, 
Мылтығына жабысты. 
 
«Тарс» етти мылтық бирден тек,
Қулады сарқып қырғаўыл.
Адамлар бүкти тепкилеп,
Болып кетти «урҳа-ур»... 
Өлимге оның жалынбай,
Көрдим алысып атқанын.
Бир жапырақ жалындай
Урынып, лаўлап жатқанын. 
Ойладым сонда: жалынлап
Жасай билде, сүйе бил.
Өлериңде де лапылдап,
Жалын болып сөне бил! 
1963-жыл. Декабрь 
САДЫҚ ШАЙЫРҒА 
 
Жүрген - дəрья дейди, отырған - бойра,
Жүрдек аяқларды жоллар ҳəм сүйген.
Ғаррылар ойласа не түспес ойға

---

64 
Дийўал қысып кетер шықпасаң үйден. 
Жатқанға не айтар төсек ҳəм дастық?
Мезгилсиз қартаймақ - өмирге қаслық,
Бахытлы ғаррылық - екинши жаслық,
Мисли кеш түскенде атқан таң деймен. 
Бүлбил қус баласын алып жанына, 
Сайраўды үйретер палапанына ...
Қалмайын деп жас əўладтың шаңына,
Күни-түни қəлем тартарсаң деймен. 
Мен ҳайранман баз бир шайыр досларға, 
Шаршадым дер шықпай атып асқарға.
Сол иштен қартайып туўған жасларға
Жасарыўдың жолын айтарсаң деймен. 
Көз əйнекти сүймес нураний көзиң, 
Кеўилге заўық берер көп айтқан сөзиң, 
Пахтадан - Шамурат, қосықтан - өзиң 
Ел кəрўанын мықлап артарсаң деймен. 
Алпыстан асқансоң азыў кетилсе,
Қапталынан жеткиншеклер жетилсе, 
Заман даңқы ушын талап етилсе, 
Космосқа ҳəм барып қайтарсаң деймен. 
Ел жапқан елтири бойға шақ дейди, 
Халық сүйгенниң несибеси нақ дейди.
Қартлар Сизге қусап жасарсақ дейди, 
Ал мен сиздей болып қартайсам деймен. 
1963-жыл, август.