M. Dáwletov, Sh. Allaniyazova, D. Seytqasımov, A. Dáwletova

59-shınıǵıw. Gáplerdi kóshirip jazıń. Baslawısh penen bayan-
lawıshtıń astın sızıń.
O, tuwılǵan jer! Aqdárya sızılıp, jilwa taslap, oynap aǵıp 
tur. Paroxod jolǵa shıqtı. Aqdáryanıń aǵısı qattı. Araldan 
Nókiske shekem Ámiwdáryanı boylap birinshi saparım. Paro-
xodtıń ústinde eki jaǵaǵa qarayman da otıraman.
Mine mınaw — Zayır, Aspantay, Qızıljar. Anaw — Qazan-
ketken, tawlar kórindi. (K. S.) 
Wa-ha-ha baslanıp ketti. Gúlziyba degen juwabıy shayır 
qız bar. (K. S.) Biz jasaǵan jer oǵırı keń, úlken. (T. Q.) 
Búgingi jumısım — jazıw. (T. Q.)
60-shınıǵıw. Oqıń. Bayanlawıshlardı tawıp, dúzilisine qaray 
qanday bayanlawısh ekenin hám qanday sózlerden bolǵanın aytıp 
beriń.
Búgingi aqsham burınǵı jawǵan qardıń ústine taǵı qar 
jawıp shıqtı. Onıń qalıńlıǵı dizege keledi. Adımıńdı atıp 
erkin júre almaysań. Ombalap qalasań. Bul jer betinen 
ósimlik tuqımın, dán izlep tirishilik etetuǵın quslarǵa júdá 
qıyın boldı. Qardıń qalıńlanıp uzaq waqıt jer dastanıp 
jatıwı ferma hám jeke menshiginde malı bar xojalıqlarǵa da, 
jabayı haywanlarǵa da jeńil bolmadı.
Men qar jawıp shıqqan aqsham jatqan ornımnan erterek 
oyandım. Kiyindim. Qolıma aǵashtan islengen gúrek alıp, 
esik aldında kólbep jatırǵan qardı arttım. (X. S.)
61-shınıǵıw. Ózlerińizdiń oylarıńızdan yamasa kórkem shıǵar-
malardan jay bayanlawıshı bar tórt gáp, qospa bayanlawıshqa 
tórt gáp tawıp jazıń. Olardıń hár túrli sóz shaqaplarınan dúzi-
liwin esapqa alıń.
62-shınıǵıw. Naqıllardı kóshirip jazıń.
1. Kóp penen kórgen ullı toy. 2. Kóz — qorqaq, 
qol — batır. 3. Batırǵa da jan kerek. 4. Adam — adamǵa 
miyman. 5. Jaman aytpay jaqsı joq. 6. Dos — egiz, dush-
pan — segiz. 7. Qonaq — qoydan juwas. 8. Esitpegen elde 
kóp. 9. Gúlsheli bala súymege jaqsı. 10. Altın alma, alǵıs 
al.

---

49