Оталар сўзи ўҒри эпизод №1. ҚАмоқхона олди. Кун

ЭПИЗОД №26. АЗАМАТНИ УЙИ. ТУН.
Орадан бироз вақт ўтган. Азамат энди катта йигитлар каби кийинган кайфи анча баланд холда уйга шошиб кириб келади. Югурганидан бўлса керак ҳансираб қолган.
АЗАМАТ: Дада! Дада қаердасиз?!!
Қудрат ака зинадан тушиб келади. Унга Гули опа ҳам эргашади.
ҚУДРАТ АКА: Ҳа, тинчликми ўғлим?
АЗАМАТ: Тинчликмас!!! Бизни милициялар қидириб юрибди!
ГУЛИ ОПА: Нима бўлди ўзи? Тушунтириб гапирсангчи?
АЗАМАТ: Битта уйга ўғриликка тушгандик...Эгаси чиқиб қолди...Қаттиқроқ уриб юборган эканман...Ўша жойни ўзида ўлди!!! Изимизга милиция тушган!!! Танишлариз кўп-ку, бир нарса қилинг!
ҚУДРАТ АКА: Нима? Ахир нима етмайди сенга? Шу пайтгача мени куйдириб адо қилдинг-ку!!! Бутун йиққанларимни ҳам соттириб тамом қилдинг!!!
АЗАМАТ: Бақирманг менга!!! Нима, мендан аяйсизми пулингизни! Битта-ю, битта ўғлингиз бўлсам!!! Бўлинг, менга пул топиб беринг! Хозир қочиб кетмасам, мени қамашади!
Шу пайт кўча тарафдан милициянинг мигалка товушлари эшитилади. Ҳаммалари карахт бўлиб қотиб қолишади.
АЗАМАТ: Ана, келишди!!! Бўлди, энди мен тамомман!!!
Азамат иложсизликдан ерга тиззалаб ўтириб қолади.
ГУЛИ ОПА: (қошлари чимирилиб бўш келмай) Сенда айб йўқ ўғлим! Қўрқма, даданг ўзи гаплашади!!!
ҚУДРАТ АКА: (юрагини ушлаб) Нима? Нимани гаплашаман аҳмоқ хотин..!Вой...Вой юрагим...
Энди Қудрат ака ҳам турган жойидан “гурс” этиб ерга қулайди...Гули опа бақирганича қолади. Ташқарида эса милицияни мигалка товушлари бутун маҳаллани тутади...
ЭПИЗОД №27. КАСАЛХОНА. КУН. ХОЗИРГИ ДАВР.
Азамат ҳикоясини тугатган. Бир нуқтага тикилиб ётибди. Умид ҳам ўйланиб қолган.
АЗАМАТ: (қаттиқ йўталиб) Бошимдан ўтган кунларни душманимга ҳам раво кўрмайман. Ойим билан гаплашиб турардик. Охирги марта мени кўргани борганларида улар ҳам ўзларини роса олдириб қўйгандилар...Мен ҳам манави ифлос касални юқтирдим...Давоси топилмаслигиниям биламан...Тақдир мени шундай синади...