Өзбекстан республикасының жынаят кодекси 2023 жыл Өзбекстан республикасының жынаят кодекси

ХVI БАП. ӘДИЛ СУДЛАЎҒА ҚАРСЫ ЖЫНАЯТЛАР

230 -статья. Айыпсыз адамды жуўапкершиликке тартыў
Сорастырыўшы, тергеўши яки прокурор тәрепинен айыпсызлығы белгили болған шахсты жәмийетлик қәўипли қылмысты ислегенликте айыплап жуўапкершиликке тартыў —
еки жылдан бес жылға шекем еркин шеклеў яки бес жылға шекем еркинен айырыў менен жазаланады.
Усы ҳәрекет аўыр ямаса оғада аўыр жәмийетлик қәўипли қылмыс ислегенликте айыпланып —
бес жылдан сегиз жылға шекем еркинен айырыў менен жазаланады.

230¹ статья. Дәлиллерди қәлбекилестириў
Дәлилеўди әмелге асырып атырған шахслар ямаса дәлиллеўде қатнасыў ушын таярлап атырған шахслар тәрепинен дәлиллердиң тергеўге шекем тексериў ҳәм жынаят ислери материаллары бойынша дәлиллерди топлаў, тексериў ҳәм баҳалаў сыяқлы ғәрезли яки басқа пәс нийетлерде ҳүжжетлерге яки буйымларға биле турып жалған мағлыўматларды киргизиўде ҳәм басқаша бурмалап көрсетиўде көринетуғын қәлбекилестириў —
базалық есаплаў муғдарының үш жүз есесинен төрт жүз есесине шекем муғдарда жәрийма ямаса белгили ҳуқықтан айырып, үш жылдан бес жылға шекем еркин шеклеў яки үш жылдан бес жылға шекем еркинен айырыў менен жазаланады.
Усы ҳәрекетлер:
а) бир топар шахслар тәрепинен алдынан тил бириктирип исленген болса ;
б) шахсты услап турыўға, қамаўға, жынайый жуўапкершиликке тартыўға ямаса жынайый жуўапкершиликтен азат етиўге, ҳүким етиўге яки ақлаўға себеп болса, —
белгили ҳуқықтан айырып, бес жылдан жети жылға шекем еркинен айырыў менен жазаланады.
Аўыр ямаса оғада аўыр жынаят ҳаққындағы жынайый иси бойынша дәлиллерди қәлбекилестириў, сондай-ақ дәлиллерди қәлбекилестириў аўыр ақыбетлерге себеп болса, —
белгили ҳуқықтан айырып, жети жылдан он жылға шекем еркинен айырыў менен жазаланады.

230²-статья. Оператив-қыдырыў искерлиги нәтийжелерин қәлбекилестириў
Жынаятты ислеўге байланысы жоқ екенлиги алдынан белгили болған шахсты жынайый тәқип етиў мақсетинде яки шахстың қәдир қымбатына ҳәм искерлик абыройына зыян келтириў мақсетинде оператив-қыдырыў искерлиги нәтийжелерин оператив-қыдырыў шараларын әмелге асырыўға ўәкилликли шахслар тәрепинен қәлбекилестириў —.
базалық есаплаў муғдарының бир жүз елиў есесинен үш жүз есесине шекем муғдарда жәрийма ямаса белгили ҳуқықтан айырып, бир жылдан үш жылға шекем еркин шеклеў яки үш жылға шекем еркинен айырыў менен жазаланады.
Усы қылмыслар ахпаратты жасырын алыў ушын мөлшерленген арнаўлы техника қуралларыннан пайдаланып исленген болса, —
базалық есаплаў муғдарының үш жүз есесинен төрт жүз есесине шекем муғдарда жәрийма ямаса белгили ҳуқықтан айырып, үш жылдан бес жылға шекем еркин шеклеў яки үш жылдан бес жылға шекем еркинен айрыў менен жазаланады.