Педагогик атамалар луғати

Турғунлик – доимий, мустақил амал қилувчи ҳолатга эришишни таъминловчи педагогик тушунчалар.
Тушуниш – 1) ўқув-тарбия жараёнида идрок ёки тафаккур объекти ҳисобланган нарса ва ҳодисалар ҳақида янги тасаввур, тушунча, ҳукмлар ҳосил қилиш имконияти, ҳодисаларни белгиларига кўра бошқа нарса, ҳодисалардан фарқлашга оид тушунчага эга бўлиш; 2) айрим жараёнлар, ҳодисалар орасидаги боғлиқлар, воқеа ва ҳодисаларнинг келиб чиқиш сабабларини, матн мазмунининг моҳиятини очиш кабиларга асосланган руҳий ҳолат.
Тушунтириш – ўқувчи ва талабаларга сўз воситасида ўқув материалларини тушунтириш, шарҳлашдан иборат педагогик метод.
Тушунтириш-кўргазмали ёндашув – ўқитувчилар машғулот давомида ўқув услубий адабиётлардаги кўргазмали воситалар орқали «тайёр» ҳолда билим оладилар.
Тушунтириш, намойиш этиш методи - ўқувчиларнинг ахборотни ўзлаштиришини ташкил этиши жараёни.
Тушунча – нарса ва ҳодисаларнинг муҳим хусусиятлари, алоқалари мазмун-моҳияти ва муносабатларини акс эттирувчи тафаккур шакли.
Тўлиқлик – педагогик билими ва тушунчаларни мумкин қадар яхлит ифодаланиши.
Тўғрилик – шахснинг ўз бурчи ва эътиқодига садоқатлилик, топширилган ишга самимий ёндашиш, ҳақиқатгўйлик орқали ифодаланувчи ахлоқий сифати.


У


Узлуксиз таълим – ўзаро мантиқий изчиллик асосида боғланган ҳамда соддадан мураккабга қараб ривожланиб борувчи ва бир-бирини тақозо этувчи босқичлардан иборат яхлит таълим тизими.
“Узлуксиз таълим” журнали – Республика узлуксиз таълим тизимида таълим босқичлариаро тизимлиликни таъминлаш, таълим соҳасини юксалтиришга ҳисса қўшиш, етук мутахассис кадрлар тайёрлашга кўмаклашиш, илмий-методик янгиликларни ёритиш ва унинг тарғиботчи-ташвиқотчиси сифатида фаолият кўрсатишга қаратилган илмий методик журнал. Муассислари Ўзбекистон Республикаси Халқ таълими вазирлиги ва Т.Н.Қори Ниёзий номидаги Ўзбекистон Педагогика фанлари илмий тадқиқот институти. Журнал 2001 йилда ташкил этилган.