Уй вазифаси – ўқувчиларнинг уйда бажарадиган, дарсдан кейинги мустақил иш шакли.
Уйғунлик – муайян ўқув предметига оид ўқув материали мазмунининг шахсни ривожлантириш шакли, методи ва усуллари билан уйғун тарзда ифодаланиши.
“Умид ниҳоллари” спорт ўйинлари – Ўзбекистоннинг умумий ўрта таълим ва болалар-ўсмирлар спорт мактаблари ўқувчилари ўртасида ўтказиладиган оммавий спорт мусобақалари.
Умумий лаёқат – билимларни нисбатан осон ва сифатли ўзлаштиришни таъминловчи шахс хусусиятлари тизими.
Умумий малака – жамият ахлоқий меъёрларининг юқори даражада ўзлаштирилиши.
Умумий педагогика – инсон ёши, руҳий ҳолати, шахсий хусусиятларидан қатъий назар унга таълим-тарбия бериш қонуниятлари, методлари, тамойилларини аниқлаш билан шуғулланувчи фан.
Умумий ўрта таълим – 1-9-синфларда ўқувчиларга таълим-тарбия бериш ва уларни баркамол шахс сифатида ривожлантириш тизими.
Умумий ўрта таълим мактаби – ўқувчиларга умумий ўрта таълим берувчи таълим муассасаси.
Умумий қарорлар – таълим муассасаси фаолияти ва жамоа аъзоларининг иш тартиби, таълим муассасаси регламентини белгилаш ҳақидаги умумий тавсифга эга бўлган ҳукм.
Умуминсоний қадрият – муайян жамият, маданият ёки тарихий давр билан бевосита боғланмаган, кишилар томонидан қабул этилган қадрият.
Умумлаштириш – шахснинг воқеликни билиш, тадқиқ этишдаги муҳим фикрий ҳаракати ҳамда нарса ва ҳодисаларнинг ўхшаш муҳим белги, хусусиятларини, боғланишларни фикран муайян тушунчага бирлаштириш жараёни ва унинг натижаси.
Умумлаштириш методи – шахснинг воқеликни билиш, тадқиқ этишдаги муҳим фикрий ҳаракати ҳамда нарса ва ҳодисаларнинг ўхшаш муҳим белги хусусиятларини, боғланишларни фикран муайян тушунчага бирлаштириш йўллари ва усуллари.
Умумпедагогик технология – турли даражада тизмларни ифодалайдиган айрим таълим муассасасидаги барча таълим-тарбия соҳаларига тегишли бўлган технологилар.
Университет – табиий, ижтимоий ва гуманитар йўналишда юксак малакали мутахассислар тайёрлашга йўналтирилган кўп тармоқли олий ўқув-илмий муассаса.
Do'stlaringiz bilan baham: |
