«Pedagogika hám psixologiya» bakalavr tálim baǵdarı 4-g- kurs talabasınıń pedagogika hám psixologiya pánlerin oqíTÍw metodikasí páninen

Joybarlastırıw iskerligi oqıwshı -talabalar menen islesiwdi shólkemlestiriwdiń eń kópshilikke arnalǵan formalarınan bolıp tabıladı. Joybarlastırıw metodı — oqıtıwdı shólkemlestiriw bolıp, oqıwshı -talabalar joybarlaw procesi hám ámeliy wazıypalardı orınlawı arqalı joybar kóriniste bilim aladı. Joybarlastırıw metodın qóllaw nátiyjesinde joybar (proekt) kórinisindegi bilim ózlestiriledi. Oqıtıwshı hám oqıwshı ortasındaǵı múnásibetlerdi ańlatiwshı birge islesiw pedagogikasına súyene otirip, talabalardıń birgelikte bilim alıwı ámelge asıriladı. Talabalardıń birgelikte bilim alıwı oqıtıw processlerin joybarlaw, talabalar menen islesiwdi joybarlaw sıyaqlılar zamanagóy pedagogikalıq texnologiyalardıń tiykarǵı metodları bolıp esaplanadı.
Oqıw -tárbiya processinde payda bolǵan jańa pedagogikalıq múnásibetler usı processte zamanagóy pedagogikalıq texnologiyalardı paydalanıwdı talap etedi.
Pedagogika páni hám ámeliyatında hár qıylı jantasıwlar qollanıladı. Awızsha -kórgezbeli, izertlew, sistemalı, funksional, kompleks, texnologiyalıq, mashqalalı -elementli, iskerlikli jantasıwlar.
Awızsha -kórgezbeli jantasıw. Ol dástúriy bolıp, tiykarınan oqıtıwshınıń informaciya beriwi, oqıwshı - talabanıń bilimdi qabıl etiwi, toplawı hám yadında saqlawı menen belgilenedi. «Bilim» túsinigi este saqlanatuǵın informaciya mánisinde túsiniledi. Bunday bilimler, olardı qollay alıw kónlikpeleri arqalı tekserip kóriledi. Bul sistemadaǵı bilimler — tiykarınan este saqlap qalıw nátiyjesi rásmiy maǵlıwmat bolıp tabıladı. Ol kóbinshe júzeki bolıwı da múmkin. Olar yad tubinde saqlanǵan boladı yamasa basqa sóz menen aytqanda, tek oǵan qaratılǵan tuwrıdan-tuwrı soraw qoyılǵanda eske alınadı. Qayta eske alıw dárejesindegi bilim uzaq waqıt yadta saqlanbaydi. Talaba soraw berilgende onı eslewi, geyde bolsa ulıwma esley almaslıǵı da múmkin.
Awızsha -kórgizbeli jantasıw respublikamızdıń oqıw orınlarında keń tarqalǵan. Maǵlıwmat beriw sistemasında tayar bilimlerdi «oqıtıwshı-talabalarǵa», olardıń mútajligi hám aktivlik dárejesine baylanıslı bolmaǵan halda, tikkeley beriwi múmkin bolǵan múmkinshilikten kelip shıǵadı. Sonday eken, usıǵan kóre oqıtıwshınıń tiykarǵı waziypası — kerekli informaciyanı xabar beriwi jáne onı yadta bekkemlew ústinde islew bolıp tabıladı. Guzeevtin’ atap ótiwinshe, dástúriy metodikaǵa tán bolǵan ózgeshelik baǵdarlama talaplarında ańlatılatuǵın oqıtıw maqsetlerin «ózlestiriw» túsinigi qabıǵına oralǵan qanday da bit túsiniksiz kóz- qaras penen xarakterlenedi. Bunda oqıtıw processinde kóbirek tabısqa erisken oqıtıwshılardıń jumıs tájiriybelerin ulıwmalastırıw tiykarında oqıtıw processleri shólkemlestiriledi. Hár bir anıq jaǵday ushın aldıńǵı oqıtıwshı (pedagog )lardıń pedagogikalıq iskerligi úlgisi izlenedi, biraq bilimlendiriw sistemasında iskerlik alıp barıp atırǵan bir qatar ilimpazlar hám ámeliyatshılar bólek metodikalardıń dáwiri ótip ketkenligi hám hár qanday aldıńǵı pedagoglar tájiriybelerin ulıwmalastırıw sistemalı hám maqsetke baǵdarlanǵan, nátiyjeli bilim alıwdı qurıw imkaniyatın bermewin atap kórsetip atır.