Sabzavotlar marinadlari

Patissondan konserva tayyorlash. Buning uchun yangi uzilgan, urug‘i pishmagan, mayda va oqish-yashil rang yoki sarg‘ish rang patissonlar tanlanadi. Butunligicha konservalanadigan patissonlarning ko‘ndalang diametri 7 sm dan ziyod bo‘lmasligi lozim. Yirik patissonlar bir necha bo‘lakka bo‘lingan (to‘g‘ralgan) holda konservalanadi.
Patissonlar saralanadi, mevabandlaridan tozalanadi va qaynab turgan suvda 0,5-1 daqiqa davomida part qilinadi va sovuq suvda sovitiladi. Bankaning tubiga ziravor va to‘g‘ralgan oshko‘klar tashlanadi, keyin yirikligi va rangi bir xil patissondar to‘ldiriladi, ustiga 90-95°C gacha isitilgan 5% li sirkali namakob qo‘yiladi.
5%li namakob hosil bo‘lishi uchun 1 l suvda 50 g tuz eritiladi va unga 80% li sirka kislotasi (1 l suvga 12,5 sm³ hisobida) qo‘shiladi. Sirkali namakob tayyorlash usuli: sirlangan idishdagi qaynab turgan suvga zarur miqdorda tuz tashlanadi, tuz butunlay erigach, namakob suziladi va bankaga qo‘yish oldidan unga sirka kislotasi qo‘shiladi.
Bankalar yoki ballonlarga sirkali namakob qo‘yilgach, ular tunuka qopqoqlar bilan engil bekitilib, issiq (75-80°C) suvli kastryulьkaga joylanadi va muayyan vaqt davomida qodiriladi. 100°C da 0,35 l bankalar – 5 daqiqa, 0,5 l bankalar – 5 daqiqa, 1,0 l bankalar – 8 daqiqa, 85°C da 2,0 l bankalar – 15 daqiqa va 3,0 l ballonlar – 20 daqiqa qizdirilishi lozim.
Shunga e’tibor berish kerakki, 100°C da qizdirilgan vaqtda suv kattiq qaynamasin, 85°C da qizdirilgan (pasterizatsiya qilgan) vaqtda esa harorat 90°C dan oshmasin.
Belgilangan muddat o‘tgach, banka (ballon)lar suvdan olinadi, qopqoqlari darhol burab mahkamlanadi va ular to‘ntarib qo‘yilgan holda sovitiladi.
0,5 litrli 10 banka konserva tayyorlash uchun 3,2 kg patisson, 2,0 l sirkali namakob (namakob uchun 100 g tuz va 80% li 25 sm³ sirka kislotasi ishlatiladi), 15 g petrushka, 50 g ukrop, 30 g selderey, 30 g erqalampir bargi, 5 g yalpiz yaprog‘i, 15 g sarimsoq, 3,5 g achchiq qalampir, 2 g tuyilmagan xushbo’y, chuchuk murch, 1 g lavr yaprog‘i kerak bo‘ladi.