Зиёвуддин Раҳим Дилдаги гаплар СЎзбоши

8-БЎЛИМ. ЎЗБЕКНИНГ ГАПИ ҚИЗИҚ 
ҚОРА МУШУК ҲАҚИДА 
Савол: Агар бир одам йўлда кетаётганида олдидан қора мушук ўтиб қолса, нима бўлади? 
Жавоб: Олдидан қора мушук ўтган бўлади. 
Савол: Қора мушук ўтиб қолганида нима қилинади? 
Жавоб: Юришда давом этилади. 
Савол: Қора мушук бахтсизлик келтиради, деган гап ростми? 
Жавоб: Қора мушук сичқонларга қирон келтириши мумкин, лекин ҳеч кимга бахтсизлик 
келтирмайди. 
“КЕРАК”, “ЛОЗИМ”, “ЗАРУР” СЎЗЛАРИ ХУСУСИДА 
“Керак” сўзини ўз ўрнида ишлата билиш керак. 
“Лозим” сўзини ҳуда-беҳудага ишлатмаслик лозим. 
“Зарур” сўзи ҳам ҳолатга қараб, энг зарур ўринларда қўлланади. 
ТАШЛАБ ЮБОРИШГА ОЛИНГАН ОЛМА 
Ўзбекнинг гапи қизиқ. Бозордан олма ёки узум олмоқчи бўлсангиз, айрим сотувчилар: “Сизга 
нимага керак – ейишгами ёки меҳмонга қўйишгами?” деб сўрайди. Шунда сиз ҳам: “Ташлаб юборишга 
икки кило олма беринг”, десангиз, қандай бўларкин?.. 
9-БЎЛИМ. УМУМИЙ МАВЗУЛАР 
БЕАЙБ ПАРВАРДИГОР 
Сизга қарши фикр айтган ҳар қандай одамни адашганга чиқаришингиз нотўғри. Чунки сиз ҳам 
ожиз бандасиз, нуқсон-камчиликдан холи эмассиз. Балки айбингиз ўзингизга билинмас. 
ЗЕРИКАРЛИ ДАБДАБА 

---

Инсоннинг ҳолати қизиқ: фалон пул сарфлаб, минг машаққат билан ҳашаматли, данғиллама 
уйлар қуради. Кейин тоққа бориб, жўнгина далаҳовлиларни ижарага олиб, ҳордиқ чиқаришни истайди. 
Дабдаба, ортиқча зеб-зийнат одамни чарчатади. Инсон асли тупроқдан яратилгани учун ҳам 
оддий уйларга, содда жойларга, сунъийликдан, шовқин-сурондан йи­роқ сўлим гўшаларга талпинади. 
Бу хис­лат унинг тийнатида бор. 
БОЙЛИК – ВОСИТА 
Бойлик яхшилик йўлида бир восита, халос. Шунинг учун бойлик дилда эмас, қўлда бўлсин. 
ЗАМОН ВА ОДАМЛАР 
Замон ўзгармоқда, дейилади. Аслида замон эмас, одамлар ўзгаради. 
Замон бузилиб кетди, дейилади. Аслида замон эмас, одамлар бузилади. 
Бу гапни замон кўтармайди, дейилади. Аслида гап замонга эмас, одамларга оғирлик қилади.