Ибрайым Юсупов

Abat obrazı. Dramanıń tiykarın quraytuǵın hám waqıyanı sheshiwge tikkeley qatnasıwshı shıǵarma qaharmanı – Abat.
Jazıwshınıń jetiskenligi menen sheberligi de usı tulǵanı dóretiwden ayqın kórinedi. Avtor shınlıq turmıs tiykarında Abat sıpatlaması arqalı qaraqalpaq miynetkeshleriniń sana-seziminiń ósiwin, eziwshilikke qarsı bas kóteriwin, baxıttı gúres jolı menen alıw múmkin ekenligin moyınlawǵa jetkenligin kórsetken.
Mazmunı tariyxıy shınlıqqa tiykarlanıp, Abattıń ósiw jolın durıs kórsetken. Abat hesh nárseni ele túsinip jetpegen haq kewilli jas jigit, awırmanlıqlardıń bárine de shıdam beredi.
Juwha Úzildik Abattıń usı isengish hám haq kewilliginen paydalanıp, onı talay ruwxıy qıyınshılıqlarǵa duwshar etedi. Óz súyiklisi Aygúl menen Abat neshe mártebe qolaysız jaǵdaylarda qaladı.
Abattan seskengen Palımbet onıń kózin joq etiw maqseti menen onı márdikarǵa jibermekshi boladı.
Kem-kemnen Abat átiraptı qorshap alǵan awır turmıs penen tanısadı, sana-sezimi ósedi. Ol dostıń, dushpannıń kim ekenligin ańǵarıp, endigiden bılay bunday zulımlıqqa kóniw múmkin emesligin túsinedi. Abat Sermanǵa qarata:

Neshe jıl qolıńda ezildim zarlap,

Endi jılap tura almayman bunı bil, -
deydi.
Aygúldi ańsat qolǵa túsiriwdi oylaǵan Palımbet Abattı márdikarǵa jiberip tınadı.
Abat xalıq táǵdiri menen de tıǵız baylanısqan jigit. Ózin xalıqtıń bir ulı dep esapladı hám sol xalıqtıń baxtı ushın gúresedi.
Uzaq waqıt alıp barǵan gúreste Abat baxıtqa erisedi hám súyiklisi Aygúlge qosıladı.
Abat tulǵasında avtor qaraqalpaq xalqınıń eń jaqsı qásiyetlerin haq kewillilik, ádillik, miynet súygishlikti h.t.b. sheber kórsete bilgen. Ol óz basınıń házliginen xalıq súyiwshiligin, xalıq baxtın joqarı qoyadı. Sonlıqtan da, xalıq Abattı qádirlep, onı húrmet etedi.
Abat tulǵası hárekette, gúres ústinde kórsetiledi. Abattıń basınan keshken qıyınshılıq, baxıt ushın gúres hám sol baxıtqa erisiwshilik – qaraqalpaq miynetkeshleriniń basıp ótken jolın eske túsiredi, mine, Abat sıpatınıń ayrıqshalıǵı usında.