Ибрайым Юсупов

Watandarlıq urıstan sońǵı jıllardaǵı dóretpesi. Ullı Watandarlıq urıstan sońǵı dáwirde J.Aymurzaev kórkem ádebiyattıń barlıq janrında isledi, onıń rawajlanıwına, jetilisiwine úlken úles qostı. Jazıwshıǵa «Qaraqalpaqstan xalıq jazıwshısı» húrmetli ataǵı berildi hám respublikalıq Berdaq atındaǵı sıylıqtıń laureatı bolıwǵa eristi.

Neshshe aylap, neshshe jıllap kúttik biz,

Jaynaǵan jeńistiń shadlı saatın, -

dep jazǵan edi.

Biziń jeńisimizge arnalǵan «Baxıtlı zaman», «Keldi kútken kúnimiz» qosıqları xalıqtıń súyikli shıǵarmalarına aynaldı.
Shayırdıń tuwǵan úlkesiniń ájayıp tábiyatı kóz jetpes paxta maydanı, tolqıǵan Ámiwdár`ya h.t.b. onıń shayırlıq qıyalın terbetedi. Usı sulıwlıqtı dóretken erkin miynet, adam kúshi kórkem formada óz kórinisin taptı:

Erkin miynet elimizde azatlıq,

Qulpı dóndi baǵlar menen dalamız,
Keń dalanı bólip kolxoz kúshleri,
Kókti súyer sulıw salǵan qalamız

degen qatarlarında shayır pidákerli miynetti súwretlep bergen.

Shayır baxıtlı zamanda jasawshı xalıqlardıń doslıǵın sáwlelendirdi:

Jetimnen jetilip, azamat boldım,

Tatıp bul erkinlik, doslıqtıń palın,
Saz benen sáwbetti daǵaza etip,
Qolǵa aldım baxıt zaman duwtarın.

Óziniń lirikalıq qosıqlarında J.Aymurzaev elimizdegi hádiyselerge ún qosıp otırıw menen birge, ol hádiyselerdi kórkem etip sáwlelendirip beriwge umtıldı. Miynet protsessi, xalıqlar doslıǵı shayırdıń kóp ǵana qosıqlarına mazmun boldı.

«Aygúl hám Abat» draması. J.Aymurzaev dramaturgiya janrında ádewir shıǵarma dóretken belgili jazıwshı bolıp tabıladı. 30-jıllardan baslap onıń p`esaları respublikamızda keńnen belgili. Bulardıń eń belgilileri «Hákisliler», «Óz tayaǵı ózine», «Leytenant Elmuratov», «Aygúl hám Abat», «Ámiwdár`ya boyında», «Ráwshan», «Berdaq», «Sheberxannıń shırmawıǵı», «Qádirdan doktor» h.t.b.
Tematikalıq jaqtan bular turmıstıń hár túrli máselelerin súwretlewge arnalǵan. Usılardıń ishinde uzaq waqıtlardan beri teatr saxnasınan bekkem orın alıp kiyatırǵan «Aygúl hám Abat» muzıkalı draması ushın jazıwshıǵa respublikalıq Berdaq atındaǵı sıylıq berildi.
Drama Ullı Watandarlıq urısınan keyin jazıldı. Shıǵarmada sóz bolatuǵın barlıq waqıyalar p`esanıń bas qaharmanları átirapına toplaǵan. Bulardıń ishinde eń aldı menen kózge túsetuǵın – Abat.